પેપ્લમ ટૉપ્સનું પાવરફુલ કમબૅક

આજના સમયનું પેપ્લમ માત્ર સ્વીટ કે ગર્લી નથી પણ એ વધુ પાવરફુલ અને આર્કિટેક્ચરલ છે. એ તમારા ફિગરને માત્ર આકાર નથી આપતું, તમારા વ્યક્તિત્વમાં એક અનોખો આત્મવિશ્વાસ પણ ઉમેરે છે

પેપ્લમ

૨૦૧૦ના દાયકામાં પેપ્લમ એક સેફ ફૅશન મનાતી હતી. ઑફિસવેઅરથી લઈને પાર્ટીવેઅર સુધી એ દરેક જગ્યાએ ફિટ બેસતું હતું. એ સમયે એની સ્ટાઇલ ફિક્સ હતી. ટાઇટ કમર, નીચે ઘેર અને એની સાથે સ્કિની જીન્સ કે પેન્સિલ સ્કર્ટ. જ્યારે ફૅશન-વર્લ્ડ ધીમે-ધીમે આરામદાયક અને રિલૅક્સ્ડ ફિટિંગ તરફ વળ્યું ત્યારે પેપ્લમની આ ટાઇટ ફિટિંગવાળી સ્ટાઇલ જૂની લાગવા માંડી. લોકો એને આઉટડેટેડ માનવા લાગ્યા, પણ હવે પેપ્લમે જે રીતે કમબૅક કર્યું છે એ જોઈને ફૅશનપ્રેમીઓ દંગ રહી ગયા છે. 

પેપ્લમનું મૉડર્ન વર્ઝન - જો તમને લાગતું હોય કે પેપ્લમ જૂના જેવું જ હશે તો તમે ખોટા છો. આ વખતના પેપ્લમમાં ડિઝાઇનર્સ ઘણું નવું લાવ્યા છે. 

આર્કિટેક્ચરલ શેપ્સ - આ વખતનાં પેપ્લમ ટૉપ્સ માત્ર ઝાલર જેવાં નથી પણ એને પ્રૉપર આકાર આપવામાં આવ્યો છે. એ પહેર્યા પછી શરીરને એક મજબૂત અને પાવરફુલ લુક આપે છે. 

એસિમેટ્રિકલ કટ્સ - હવે પેપ્લમનો ઘેર ચારે બાજુ સરખો હોવાને બદલે એક બાજુ લાંબો અને એક બાજુ ટૂંકો હોઈ શકે છે, જે એને વધુ રસપ્રદ બનાવે છે. 

હેવી ફૅબ્રિક્સ - પહેલાં પાતળા કાપડનો ઉપયોગ થતો પણ હવે જાડું સિલ્ક કે સ્ટ્રક્ચર્ડ કૉટન વાપરવામાં આવે છે જે ડિઝાઇનના આકારને જાળવી રાખે છે. 

પેપ્લમ કઈ રીતે સ્ટાઇલ કરવું?

પેપ્લમનું કમબૅક ત્યારે જ સફળ કહેવાય જ્યારે તમે એને સાચી રીતે પહેરો. આધુનિક લુક મેળવવા માટે આ ટિપ્સ અનુસરો. 

બૉટમ્સમાં બદલાવ લાવો - હવે પેપ્લમ સાથે સ્કિની જીન્સ પહેરવાનું ટાળો. એના બદલે વાઇડ લેગ ટ્રાઉઝર્સ એટલે કે પહોળાં પૅન્ટ્સ, રિલૅક્સ્ડ ડેનિમ અથવા લૉન્ગ સ્કર્ટ પહેરો. ઉપર વૉલ્યુમ અને નીચે પણ થોડો ઘેર હોવો એ આ વખતનો નવો નિયમ છે. 

કલર પૅલેટ - જો તમે ડિઝાઇન સાથે પ્રયોગ કરી રહ્યા હો તો રંગો સાદા રાખો. બ્લૅક, વાઇટ, ગ્રે કે પેસ્ટલ કલર્સ પેપ્લમની ડિઝાઇનને વધુ ઉઠાવ આપે છે. 

ઍક્સેસરીઝનો ઓછો ઉપયોગ - પેપ્લમ પોતે જ એક મોટું સ્ટેટમેન્ટ છે. તેથી ગળામાં ભારે જ્વેલરી કે ચળકતા બેલ્ટ ટાળો. એક નાની બૅગ અને સ્લીક હીલ્સ તમારા લુકને પર્ફેફેક્ટ બનાવશે.