સોનમ કપૂરનો આ લુક છે ફૅશન-ઇન્સ્પિરેશન શર્ટ-લુંગી-ડબલ દુપટ્ટા

તેના આ લુકની ચર્ચા સોશ્યલ મીડિયા પર પણ જોરશોરથી થઈ રહી છે

સોનમ કપૂર

વેડિંગ-ફૅશનમાં કંઈક નવું અને અનોખું ટ્રાય કરવું હોય તો સોનમ કપૂરના લેટેસ્ટ લુક પરથી ઇન્સ્પિરેશન લઈ શકાય. બહેન અંશુલા કપૂરની મેંદી સેરેમનીમાં સોનમે શર્ટ, લુંગી અને ડબલ દુપટ્ટાના અનોખા કૉમ્બિનેશન સાથે એવો વેડિંગ-લુક ક્રીએટ કર્યો જેણે પરંપરાગત ફૅશનને એકદમ નવો અંદાજ આપ્યો. તેના આ લુકની ચર્ચા સોશ્યલ મીડિયા પર પણ જોરશોરથી થઈ રહી છે.

વેડિંગ-ફૅશનમાં હવે માત્ર પરંપરાગત લેહંગા કે ભારે સાડી જ પસંદગી નથી રહી. આજની ફૅશનિસ્ટા ટ્રેડિશનલ આઉટફિટ્સમાં પણ નવા પ્રયોગો કરીને પોતાના લુકને યુનિક ટચ આપી રહી છે. આ વાતને ફરી એક વાર સાબિત કરી છે અભિનેત્રી સોનમ કપૂરે. પોતાની અનોખી ફૅશનસેન્સ માટે જાણીતી સોનમ કપૂરે બહેન અંશુલા કપૂરની મેંદી સેરેમનીમાં એવો આઉટફિટ પહેર્યો જે પરંપરા અને કન્ટેમ્પરરી સ્ટાઇલનું પર્ફેક્ટ મિશ્રણ છે. સોનમે બટન-ડાઉન શર્ટ, લુંગી અને બે દુપટ્ટાના કૉમ્બિનેશન સાથે એકદમ અલગ વેડિંગ-લુક ક્રીએટ કર્યો હતો. સામાન્ય રીતે શર્ટ અને લુંગીને વેડિંગવેઅર તરીકે જોવામાં આવતાં નથી, પરંતુ સોનમે પોતાની સ્ટાઇલિંગ-સેન્સથી આ અનોખા કૉમ્બિનેશનને પણ એકદમ ક્લાસી અને ફૅશન-ફૉર્વર્ડ બનાવી દીધું.

પેસ્ટલ બ્લુ અને ગ્રીનનું કૉમ્બિનેશન

સોનમનો આ આખો લુક ડિઝાઇનર પુનિત બાલાણાએ તૈયાર કર્યો હતો. આ આઉટફિટની સૌથી ખાસ વાત હતી એનું કલર-કૉમ્બિનેશન. પેસ્ટલ બ્લુ અને વાઇબ્રન્ટ ગ્રીનનો કૉન્ટ્રાસ્ટ લુકને ફ્રેશ અને આકર્ષક બનાવતો હતો. આ રંગોની જોડી જાણે સ્વચ્છ વાદળી આકાશ અને લીલીછમ કુદરતના સુંદર મિલન જેવી લાગતી હતી. આવું ફ્રેશ કલર-કૉમ્બિનેશન વેડિંગ-ફંક્શન માટે એકદમ પર્ફેક્ટ છે, કારણ કે એ ટ્રેડિશનલ હોવા સાથે લુકમાં મૉડર્ન અને યુથફુલ વાઇબ્સ પણ ઉમેરે છે.

ઓવરસાઇઝ્ડ શર્ટથી મળ્યો મૉડર્ન ટચ

ઓવરસાઇઝ્ડ શર્ટને વેડિંગ-લુકનો ભાગ બનાવીને સોનમે ફરી એક વાર પોતાની એક્સપરિમેન્ટલ ફૅશન-સ્ટાઇલની ઝલક આપી છે. ઓવરસાઇઝ્ડ સિલુએટ આઉટફિટને કમ્ફર્ટેબલ અને સ્ટાઇલિશ બનાવે છે. જે લોકો લગ્નમાં ભારે કપડાંથી દૂર રહીને કંઈક લાઇટવેઇટ પરંતુ સ્ટેટમેન્ટ-લુક ઇચ્છે છે તેમના માટે આ સ્ટાઇલ એક સારું ઇન્સ્પિરેશન બની શકે છે.

લુંગી સ્ટાઇલમાં ટ્રેડિશનલ ટચ

શર્ટ સાથે લુંગીને સ્ટાઇલ કરવાથી આઉટફિટમાં પરંપરાગત અને કન્ટેમ્પરરી ફૅશનનો સુંદર સમન્વય જોવા મળે છે. આવા આઉટફિટમાં ટ્રેડિશનલ મોટિફ્સ કે પ્રિન્ટ્સનો ઉપયોગ કરવામાં આવે તો સમગ્ર લુક વધુ આકર્ષક અને એથ્નિક લાગે છે. સોનમે લુંગીને એવી રીતે સ્ટાઇલ કરી કે પરંપરાગત પહેરવેશ પણ હાઈ-ફૅશન વેડિંગ-લુકનો ભાગ બની શકે છે. આ સ્ટાઇલનો સૌથી મોટો ફાયદો એ છે કે એ દેખાવમાં યુનિક હોવા સાથે પહેરવામાં પણ આરામદાયક છે. લાંબા સમય સુધી ચાલતા લગ્નપ્રસંગો માટે આવાં કમ્ફર્ટેબલ આઉટફિટ્સ હવે વધુ લોકપ્રિય બની રહ્યાં છે.

ડબલ દુપટ્ટાથી મળ્યો રૉયલ લુક

સોનમે આ આઉટફિટ સાથે બે દુપટ્ટા કૅરી કર્યા હતા. એક એમરલ્ડ ગ્રીન અને બીજો સૉફિસ્ટિકેટેડ સ્લેટ બ્લુ રંગનો હતો. બન્ને દુપટ્ટાને અલગ-અલગ ખભા પર પિન કરીને લેયર્ડ સ્ટાઇલ આપવામાં આવી હતી. બે અલગ રંગના દુપટ્ટાના લેયર્ડ ડ્રેપિંગે સોનમના લુકમાં ડેપ્થ, ડ્રામા અને રૉયલ અપીલ ઉમેરવાનું કામ કર્યું હતું. ખાસ કરીને બ્રાઇડલ ફંક્શન, મેંદી અથવા રિસેપ્શન માટે આ પ્રકારનું ડ્રેપિંગ આઉટફિટને વધુ ગ્રેસફુલ બનાવી શકે છે.

જ્વેલરી-મેકઅપે વધાર્યો ચાર્મ

સોનમે આ લુકને સ્ટેટમેન્ટ ઇઅર-રિંગ્સ અને ચંકી ગોલ્ડ બંગલ્સ સાથે પૂરો કર્યો હતો. તેણે મેકઅપને એકદમ મિનિમલ રાખ્યો હતો અને વાળમાં સ્લિક બન બનાવ્યો હતો, જેથી આખું ફોકસ આઉટફિટ અને જ્વેલરી પર રહે. સોનમ કપૂર હંમેશાં પોતાની ફૅશન-ચૉઇસથી ટ્રેન્ડ સેટ કરતી આવી છે અને આ વેડિંગ-લુક પણ એનો અપવાદ નથી. શર્ટ, લુંગી અને ડબલ દુપટ્ટાનું આ અનોખું કૉમ્બિનેશન એ સાબિત કરે છે કે આત્મવિશ્વાસ અને યોગ્ય સ્ટાઇલિંગ સાથે સૌથી અસામાન્ય આઉટફિટ પણ એકદમ એલિગન્ટ અને સ્ટાઇલિશ લાગી શકે છે.