અહીં મળતાં ખમણ અને પાતરાં રોજ સુરતથી આવે છે

મલાડમાં ૧૫ વર્ષ જૂના ટનાટન નામના સ્ટૉલ પર શિયાળામાં ઊં‌ધિયું પણ મળે છે અને એ માટેના શાકભાજી સુરતથી આવે છે

સેવ ખમણી અને પાતરાં (250 ગ્રામ) રૂ. 125 અને સેવ ખમણ અને પાતરાં (250 ગ્રામ) રૂ. 125

સુરતી વાટીદાળનાં ખમણ અને પાતરાં ખાવાના શોખીન તમે પણ હો તો તમારે મલાડમાં આવેલા આ સ્ટૉલ પર આવવા જેવું છે જ્યાં ડાયરેક્ટ બધું સુરતથી આવે છે. પોરિયા પરિવારના સભ્યો સાથે મળીને છેલ્લાં ૧૫ વર્ષથી મલાડમાં આ સ્ટૉલ ચલાવી રહ્યા છે. રોજ સવારે સુરતથી માલ આવે એટલે ખૂલતો આ સ્ટૉલ બપોર સુધીમાં માલ પૂરો થઈ જતાંની સાથે બંધ કરી દેવામાં આવે છે એટલી અહીં એની ડિમાન્ડ હોય છે.

ટનાટન સ્ટૉલના હિત પોરિયા આ વિશે વધુ માહિતી આપતાં કહે છે, ‘મારા પપ્પા નંદલાલ પોરિયાએ ૧૫ વર્ષ પહેલાં આ સ્ટૉલ શરૂ કર્યો હતો. હું છેલ્લાં થોડાં વર્ષોથી તેમને હેલ્પ કરું છું. હું જૉબ કરું છું, પણ રજાના દિવસોમાં સ્ટૉલ પર હોઉં છું. અમારો આ સ્ટૉલ ખમણ, પાતરાં, ખમણી, સુરતી વાટીદાળનાં ખમણ, સફેદ ઢોકળાં અને ખાંડવી માટે પ્રખ્યાત છે. સફેદ ઢોકળાં અને ખાંડવી માત્ર રવિવારે જ મળે છે. આ ખાંડવી મારી મમ્મી જ બનાવે છે. બાકીની બધી વસ્તુ સુરતથી આવે છે. રોજેરોજ સવારે સુરતથી અહીં ગાડીમાં વઘાર્યાં વિનાનાં ખમણની લાદી અને બાફેલાં પાતરાંના રોલ આવે છે જેને અમે અહીં જેમ-જેમ ઑર્ડર આવે એમ-એમ વઘારીને આપતા જઈએ છીએ. મારા પપ્પાના મિત્ર સુરતમાં ખમણનો બિઝનેસ કરે છે જેમની પાસેથી અમે બધું મગાવીએ છીએ. હવે થોડા ટાઇમમાં ઊંધિયું પણ શરૂ થશે જેમાં વપરાતાં શાકભાજી સુરતથી આવશે. અમારું દર વર્ષનું ફિક્સ જ હોય છે. ઊંધિયાની સીઝનમાં શાકભાજી સુરતથી મગાવવામાં આવે છે અને એમાંથી મારી મમ્મી ઊંધિયું બનાવે છે.’

ક્યાં મળશે? : ટનાટન સ્ટૉલ, ભારત ડ્રાયફ્રૂટ્સની સામે, ગૌશાળા લેન, મલાડ-ઈસ્ટ

સમય : સવારે ૮.૩૦ વાગ્યાથી બપોરે ૧૨ વાગ્યા સુધી અને રવિવારે સવારે ૭ વાગ્યાથી બપોરે ૧૨ વાગ્યા સુધી