ટિપ્સીટૉપ્સીની પાણીપૂરીની ઓવરફ્રાઇડ પૂરી જ ગેમ-ચેન્જર છે

આ એરિયામાં અમે સૅન્ડવિચ પુષ્કળ ખાધી છે તો ટિપ્સીટૉપ્સીની પાણીપૂરી પણ ખૂબ ખાધી છે. જોકે છ-સાત વર્ષથી અમે અહીં શો માટે આવતા ન હોવાથી ટિપ્સીટૉપ્સીની પાણીપૂરીનો આસ્વાદ તમારા સુધી પહોંચાડવાનો રહી ગયો છે.

ટિપ્સીટૉપ્સીની પાણીપૂરી

અમેરિકા-કૅનેડાની ટૂર પૂરી કરીને અમે હવે ઇન્ડિયા પાછા આવી ગયા છીએ. ઇન્ડિયા આવ્યા પછી બે-ત્રણ દિવસ મેં આરામ કર્યો અને ત્યાં જ મારે જવાનું થયું સુરત. સુરતમાં મારી એક ફિલ્મનું શૂટિંગ ચાલે છે, જેનું ટાઇટલ છે ‘રૉક ઑન રણછોડ’. આ ફિલ્મના ક્લાઇમૅક્સનું શૂટિંગ સુરતની જીવનભારતી સ્કૂલના ઑડિટોરિયમમાં હતું. આ જે જીવનભારતી સ્કૂલનું ઑડિટોરિયમ છે એ અમારા બધા નાટ્યકર્મીઓના ફેવરિટ એવા ગાંધી સ્મૃતિ ઑડિટોરિયમની સામે છે. છેલ્લાં છ-સાત વર્ષથી તો ગાંધી સ્મૃતિ બંધ છે, એનું રિનોવેશન ચાલ્યા જ કરે છે. અલબત્ત, હવે એ પૂરું થવામાં છે અને લાગે છે કે દિવાળી સુધીમાં એ ઓપન થઈ જશે. આ ગાંધી સ્મૃતિ ઑડિટોરિયમને કારણે એની સામેના એરિયામાં ઘણા ખાણી-પીણીવાળાઓ ઊભા રહેવા માંડ્યા છે. ઑડિટોરિયમ બંધ થયા પછી અમને એમ હતું કે એ લોકો હટી જશે; પણ ના, એવું થયું નહીં. આ આખો એરિયા જ ખાઉગલી જેવો બની ગયો હોવાથી બધા ત્યાં જ રહ્યા.

આ એરિયામાં અમે સૅન્ડવિચ પુષ્કળ ખાધી છે તો ટિપ્સીટૉપ્સીની પાણીપૂરી પણ ખૂબ ખાધી છે. જોકે છ-સાત વર્ષથી અમે અહીં શો માટે આવતા ન હોવાથી ટિપ્સીટૉપ્સીની પાણીપૂરીનો આસ્વાદ તમારા સુધી પહોંચાડવાનો રહી ગયો છે.

શૂટિંગ દરમ્યાન મને વિચાર આવ્યો કે અહીં સુધી આવ્યા જ છીએ તો ચાલો, જઈને જોઈ આવીએ કે ટિપ્સીટૉપ્સીનો સ્વાદ એવો જ છે કે પછી સમય જતાં બદલાયો છે. નક્કી કર્યાના બે દિવસ પછી મેં યુનિટના નાસ્તામાં બ્રેક લઈ લીધો અને હું તો પહોંચી ગયો ટિપ્સીટૉપ્સીમાં. જોકે સાહેબ, એવો જ ટેસ્ટ, એવો જ આનંદ અને એવી જ ખુશી.

પાણીપૂરીની જે પૂરી હતી એ પૂરી થોડી ઓવરફ્રાઇડ હતી. ઓવરફ્રાઇડ પૂરીની ક્રન્ચીનેસ બહુ સરસ હોય છે અને પાણીપૂરી હંમેશાં ક્રન્ચીનેસ હોય એવી પૂરીની ખાવાની જ મજા આવે. નહીં તો એમાં નાખવામાં આવતું પૂરણ અને પાણી પૂરીને સૉગી કરી નાખે અને તમને ખાવાની મજા ન આવે કે પછી પૂરી મોઢામાં જાય એ પહેલાં જ તૂટી જાય. ટિપ્સીટૉપ્સીની પાણીપૂરી ખાવામાં મને એક જ વાતની કમી લાગી અને એ હતી ગરમાગરમ રગડાની. જોકે એનો મને ખાસ અફસોસ એટલે નથી કારણ કે પાણીપૂરીમાં ગરમ રગડો નાખવાની પ્રથા આપણા મુંબઈમાં જ છે. ગુજરાતમાં મૅશ કરેલા બટાટા અને કાળા ચણા નાખીને પૂરણ બનાવે છે. જો તમે જૈન હો તો ચણા અને મગ એમાં નાખવામાં આવે. વાત કરીએ ટિપ્સીટૉપ્સીની પાણીપૂરીની.

પાણીપૂરીની જે ખાસિયત કહેવાય એ જ ખાસિયત સાથેનું અહીં પાણી હતું. તીખું પાણી એકદમ ઠંડું અને મીઠું પાણી નૉર્મલ ઠંડું. તીખું પાણી અતિશય ઠંડું હોય તો તમને એની તિખાશની તરત ખબર નથી પડતી અને તમે બે-ચાર પાણીપૂરી સરળતાથી ખાઈ શકો છો. આ જે વેપારી બુદ્ધિ છે એને લીધે જ સારી પાણીપૂરીવાળાઓને ત્યાં લાઇન હોય છે.

ટિપ્સીટૉપ્સીમાં મેં પાણીપૂરી પછી દહીંપૂરી મગાવી. દહીંપૂરીમાં પૂરીની વધારે પરીક્ષા લેવાય જાય અને એવું જ થયું. પૂરી પર લાંબો સમય દહીં પડ્યું રહ્યું તો પણ પૂરી સૉગી ન થઈ અને દહીં એકદમ ઠંડું હતું. ખાવાની મજા આવી ગઈ. હા, અહીં મેં સેવપૂરી મગાવી એમાં મને ખાસ મજા ન આવી. સેવપૂરીમાં નાખવામાં આવતી સેવ મને મુંબઈની જ ભાવે છે. ગુજરાતમાં તો ઘણી જગ્યાએ નૂડલ્સ જેવી જાડી કહેવાય એવી સેવ નાખે છે જેનાથી ખરેખર સ્વાદ બગડી જાય છે. ટિપ્સીટૉપ્સીમાં એવી સેવ નહોતી નાખી, પણ એ જે સેવ હતી એમાં મને મજા નહોતી આવી એ પણ એટલું જ સાચું છે.

ગુજરાતની એક બીજી પણ ખરાબ વાત મેં નોટિસ કરી છે. એ લોકો બધી આઇટમમાં ટમેટાં નાખે જ નાખે. અરે, ઘણા લોકો મેં એવા પણ જોયા છે જેઓ પાણીપૂરીની બાજુમાં સમારેલા કાંદા લે અને પછી પાણીપૂરીમાં નાખતા જાય અને ખાતા જાય. પાણીપૂરી જેમ ખાવાની હોય એમ જ ખવાય. આ કંઈ રીત થોડી છે ખાવાની કે તમે ઉપરથી કાંદા અને ટમેટાં નાખીને ખાઓ? ટમેટાંનો ટેસ્ટ એ પ્રકારનો છે કે એ ઘણા સ્વાદને ઓવરલૅપ કરે એટલે ટમેટાં એવી રીતે ન નાખવાં જોઈએ. ટિપ્સીટૉપ્સીમાં ટમેટાંનો એવો દુરુપયોગ નથી થતો એ સારી વાત છે. હા, અહીં ગિરદી બહુ હોય છે. તમારે જઈને કૂપન લેવી પડે. પચાસ રૂપિયાની કૂપન તમે લીધી હોય તો તમને ૭ પાણીપૂરી મળે. કેટલી? રોકડી ૭ પાણીપૂરી, પણ એ ૭ પાણીપૂરી તમે ખાઓ તો તમારું પેટ ભરાઈ જાય અને જલસો પડી જાય એ લટકામાં.