લો બોલો, હવે સ્કિનકૅર પ્રોડક્ટ્સ રાખવા માટે પણ ફ્રિજ

મોંઘું વિટામિન C સિરમ, શીટ માસ્ક અને ક્રિસ્ટલ રોલર્સને બગડતાં અટકાવવા અને એમને ઠંડાં રાખવા માટે નાનું, ક્યુટ સ્કિનકૅર મિની ફ્રિજ રાખવાનો ટ્રેન્ડ યુવતીઓમાં ખૂબ લોકપ્રિય થઈ રહ્યો છે

લો બોલો, હવે સ્કિનકૅર પ્રોડક્ટ્સ રાખવા માટે પણ ફ્રિજ

આજના સમયમાં સોશ્યલ મીડિયા પર સ્કિનકૅર ફ્રિજ અથવા બ્યુટી ફ્રિજ ખૂબ જ ટ્રેન્ડમાં છે. આ એક નાનું, આકર્ષક અને ખાસ પ્રકારનું મિની રેફ્રિજરેટર છે જેને ખાસ કૉસ્મેટિક્સ અને સ્કિનકૅર પ્રોડક્ટ્સને યોગ્ય તાપમાન  પર રાખવા માટે ડિઝાઇન કરવામાં આવ્યું છે. એ પ્રોડક્ટ્સમાં રહેલાં સેન્સિટિવ ઍક્ટિવ ઇન્ગ્રીડિઅન્ટ્સનું રક્ષણ કરે છે, ત્વચાને તાજગીભર્યો અનુભવ આપે છે અને તમારી બધી પ્રોડક્ટ્સને એક જગ્યાએ વ્યવસ્થિત રાખે છે.
સ્કિનકૅર ફ્રિજના બેનિફિટ્સ
પ્રોડક્ટનું આયુષ્ય વધારે : વિટામિન C અને રેટિનોલ  જેવા સક્રિય ઘટકો ગરમી અને સૂર્યપ્રકાશના સંપર્કમાં આવવાથી ઝડપથી ઑક્સિડાઇઝ્ડ (ખરાબ) થઈ જાય છે. પ્રોડક્ટ્સને ઠંડી જગ્યાએ રાખવાથી આ પ્રક્રિયા ધીમી પડે છે અને એ લાંબા સમય સુધી અસરકારક રહે છે.
સોજો અને લાલાશ ઘટાડે : ઠંડું તાપમાન રક્તવાહિનીઓને સંકોચે છે. તમે જ્યારે ફ્રિજમાં રાખેલી આઇ ક્રીમ, જેલ અથવા શીટ માસ્ક ચહેરા પર લગાવો છો ત્યારે એ સવારના સમયે આંખોની આસપાસનો સોજો  અને ચહેરાની લાલાશને ઝડપથી ઓછી કરે છે.
ત્વચાને શાંત કરે : ખાસ કરીને ઉનાળામાં અથવા તડકામાંથી આવ્યા પછી ઠંડું મૉઇશ્ચરાઇઝર કે અલોવેરા જેલ ત્વચા પર લગાવવાથી ત્વચાને તરત જ આરામ અને ઠંડક મળે છે.
બૅક્ટેરિયાનો ફેલાવો અટકાવે : ઑર્ગેનિક, પ્રિઝર્વેટિવ વગરની અથવા ઘરે બનાવેલી સ્કિનકૅર પ્રોડક્ટ્સ સામાન્ય તાપમાને બહુ જલદી બગડી જાય છે. ઠંડું વાતાવરણ એમાં બૅક્ટેરિયા અને ફૂગ થવાની પ્રક્રિયાને ધીમી પાડે છે.
ફ્રિજમાં શું રાખી શકાય?
વિટામિન C સિરમ અને રેટિનોલ જેલ, આઇ ક્રીમ અને અન્ડર-આઇ જેલ, શીટ માસ્ક અને ટોનર, અલોવેરા જેલ તેમ જ જેડ રોલર, આઇસ ગ્લોબ્સ અને ગુઆ શા ટૂલ્સ
શું ન રાખવું?
ઑઇલ-બેઝ્ડ સિરમ અને ફેસ ઑઇલ (એ થીજી શકે છે), ક્લે માસ્ક (માટીના માસ્કની ઠંડીથી ટેક્સ્ચર બગડી શકે છે), બામ અને ઑઇલ-બેઝ્ડ મૉઇશ્ચરાઇઝર (એ વધુ પડતા કડક થઈ જાય છે).

શું સ્કિનકૅર ફ્રિજ ખરેખર જરૂરી છે?
જો વિજ્ઞાન અને જરૂરિયાતની દૃષ્ટિએ જોઈએ તો સ્કિનકૅર ફ્રિજ એક લક્ઝરી છે, કોઈ જરૂરિયાત નથી. મોટા ભાગની જાણીતી બ્રૅન્ડ્સ પોતાની પ્રોડક્ટ્સને એવી રીતે બનાવે છે કે એ સામાન્ય રૂમના તાપમાનમાં સુરક્ષિત રહી શકે. જો તમને તમારી પ્રોડક્ટ્સ ઠંડી કરીને વાપરવી ગમતી હોય તો રસોડાના સામાન્ય ફ્રિજ કરતાં બ્યુટી ફ્રિજ વધુ સારું છે. રસોડાનું ફ્રિજ ઘણું વધારે ઠંડું હોય છે જે પ્રોડક્ટની બનાવટને નુકસાન પહોંચાડી શકે છે, જ્યારે બ્યુટી ફ્રિજ સ્કિનકૅર માટે એકદમ આદર્શ વાતાવરણ પૂરું પાડે છે. જો તમારું બજેટ હોય અને તમે સ્કિનકૅર રૂટીનને વધુ પ્રીમિયમ બનાવવા માગતા હો તો આ એક ઉત્તમ રોકાણ છે.