અમદાવાદમાં IPLની ફાઇનલ મૅચની ટિકિટનાં કાળાબજાર

ક્રાઇમ બ્રાન્ચે એક યુવકને ઝડપી લીધો : તેની પાસેથી ૧૧ ટિકિટ જપ્ત કરી : ૧૫૦૦વાળી ટિકિટનો બ્લૅકમાં ભાવ ૫૦૦૦ અને ૨૦૦૦વાળી ટિકિટનો ભાવ ૬૦૦૦

ટિકિટોનાં કાળાબજાર કરતાં ઝડપાયેલો ભાવુક ચૌહાણ.

વિશ્વના સૌથી મોટા અમદાવાદના નરેન્દ્ર મોદી સ્ટેડિયમમાં આજે ઇન્ડિયન પ્રીમિયર લીગ (IPL)ની ફાઇનલ મૅચ રમાવાની છે ત્યારે અમદાવાદમાં એની ટિકિટો બ્લૅક માર્કેટમાં ઊંચા ભાવે વેચાતી હોવાની બાતમીના આધારે અમદાવાદ ક્રાઇમ બ્રાન્ચે ફાઇનલ મૅચની ટિકિટોને કાળાબજારમાં વેચતા યુવક ભાવુક ચૌહાણને ઝડપી લીધો હતો અને તેની પાસેથી ૧૧ ટિકિટ જપ્ત કરીને કાયદેસરની કાર્યવાહી હાથ ધરી છે.

IPLની ફાઇનલ મૅચની ટિકિટોનાં કાળાબજાર કરતા ૨૧ વર્ષના ભાવુક ચૌહાણને કૉમર્સ છ રસ્તા વિસ્તારમાંથી અમદાવાદ શહેર ક્રાઇમ બ્રાન્ચે પકડી લઈને તેની તપાસ કરતાં તેની પાસેથી ફાઇનલ મૅચની ૧૧ ટિકિટ મળી હતી જે પોલીસે કબજે કરી હતી. પોલીસે આ યુવકની કરેલી પૂછપરછમાં તેણે કબૂલ્યું હતું કે તેણે ફાઇનલ મૅચની ટિકિટો ઑનલાઇન બુક કરીને મેળવી હતી અને ૧૫૦૦વાળી ટિકિટ ૫૦૦૦ રૂપિયામાં અને ૨૦૦૦વાળી ટિકિટ ૬૦૦૦ રૂપિયામાં લોકોને વેચતો હતો.