અમદાવાદ સિરિયલ બ્લાસ્ટ કેસમાં મોટો ચુકાદો, 38 દોષીઓની ફાંસીની સજા યથાવત

ગુજરાત હાઇકોર્ટે 2008ના અમદાવાદ સિરિયલ બ્લાસ્ટ કેસમાં વિશેષ અદાલતનો ચુકાદો યથાવત રાખ્યો છે. 38 દોષીઓની ફાંસી અને 11 દોષીઓની આજીવન કેદની સજાને મંજૂરી આપતાં પીડિતોને વળતર ચૂકવવાનો પણ આદેશ કર્યો છે.

પ્રતીકાત્મક તસવીર

અમદાવાદ સિરિયલ બ્લાસ્ટ કેસમાં હાઇકોર્ટે વિશેષ અદાલતનો નિર્ણય યથાવત રાખ્યો છે. હાઇકોર્ટે 38 દોષીઓની ફાંસીની સજાને મંજૂરી આપી છે. સાથે જ 11 દોષીઓની આજીવન કેદની સજા પણ યથાવત રાખવામાં આવી છે. અદાલતે મૃતકોના પરિવારજનોને 10 લાખ રૂપિયા અને ઘાયલોને 5 લાખ રૂપિયાનું વળતર આપવાનો પણ આદેશ આપ્યો છે. ગુજરાત હાઇકોર્ટે 2008ના અમદાવાદ સિરિયલ બૉમ્બ બ્લાસ્ટ કેસમાં નીચલી અદાલતના ચુકાદા સાથે સંમતિ વ્યક્ત કરી છે. આ કેસમાં દોષી જાહેર તમામ 49 લોકોને તેમની મૂળ સજા ભોગવવી પડશે. સજા યથાવત રાખવાની સાથે હાઇકોર્ટે પીડિતોને આર્થિક સહાય આપવાનો પણ આદેશ કર્યો છે.

અમદાવાદ બ્લાસ્ટ કેસ: ક્યારે શું થયું?

અમદાવાદ સિરિયલ બ્લાસ્ટ કેસમાં નીચલી અદાલતે ફેબ્રુઆરી 2022માં સજાનો ચુકાદો આપ્યો હતો. આ કેસમાં 49 દોષીઓમાંથી 38ને ફાંસીની સજા ફટકારવામાં આવી હતી. 26 જુલાઈ 2008ના રોજ અમદાવાદના અલગ-અલગ વિસ્તારોમાં શ્રેણીબદ્ધ બૉમ્બ બ્લાસ્ટ થયા હતા. સાંજે લગભગ 6:30 વાગ્યાથી રાત્રે 8:15 વાગ્યા વચ્ચે શહેરના 20થી વધુ સ્થળોએ વિસ્ફોટ થયા હતા. આ ભયાનક હુમલામાં 56 લોકોના મોત થયા હતા અને 250થી વધુ લોકો ઘાયલ થયા હતા. આ હુમલાની જવાબદારી ઇન્ડિયન મુજાહિદ્દીન (IM) નામના આતંકવાદી સંગઠને લીધી હતી.

અમદાવાદમાં ક્યાં-ક્યાં થયા હતા બૉમ્બ બ્લાસ્ટ?

અમદાવાદના કુલ 21 સ્થળોએ બૉમ્બ બ્લાસ્ટ થયા હતા. તેમાં હાટકેશ્વર, નરોલ સર્કલ, ખાડિયા, નરોડા, જવાહર ચોક, ગોવિંદવાડી, બાપુનગર, ઇસનપુર, સિવિલ હૉસ્પિટલ, એલ.જી. હૉસ્પિટલ, રાયપુર ચકલા, સારંગપુર અને સરખેજ જેવા વિસ્તારોનો સમાવેશ થતો હતો. આ કેસની તપાસ દરમિયાન 6 હજારથી વધુ પાનાંના દસ્તાવેજો અદાલતમાં રજૂ કરવામાં આવ્યા હતા. કેસમાં 1,100થી વધુ સાક્ષીઓના નિવેદનો નોંધવામાં આવ્યા હતા. આ કેસની સુનાવણી દરમિયાન 7 વખત જજ બદલાયા હતા. સ્પેશિયલ કોર્ટે 8 ફેબ્રુઆરી 2022ના રોજ આ કેસમાં ચુકાદો આપ્યો હતો. કોર્ટે 28 આરોપીઓને નિર્દોષ જાહેર કર્યા હતા, જ્યારે 49 આરોપીઓને દોષિત ઠેરવ્યા હતા.

હૉસ્પિટલોથી લઈને બજારો સુધી બૉમ્બ બ્લાસ્ટ

આ બૉમ્બ બ્લાસ્ટ સરકારી હૉસ્પિટલો, અમદાવાદ સિવિલ હૉસ્પિટલ અને એલ.જી. હૉસ્પિટલ, બસ સ્ટેન્ડ, બજારો અને પાર્કિંગ જેવા ભીડભાડવાળા વિસ્તારોમાં કરવામાં આવ્યા હતા. આતંકવાદીઓએ સાયકલ અને કારમાં ટિફિન બૉમ્બ રાખીને વિસ્ફોટ કર્યા હતા. બજારમાં પહેલો બ્લાસ્ટ થયા બાદ જ્યારે ઘાયલોને હૉસ્પિટલ લઈ જવામાં આવી રહ્યા હતા, ત્યારે આતંકવાદીઓએ સિવિલ હૉસ્પિટલના ટ્રોમા સેન્ટર બહાર કારમાં બ્લાસ્ટ કર્યો હતો. આ હુમલાની જવાબદારી ઇન્ડિયન મુજાહિદ્દીન (IM)એ લીધી હતી. ઇન્ડિયન મુજાહિદ્દીનને પ્રતિબંધિત સંગઠન સિમી (SIMI)નું કટ્ટરપંથી જૂથ માનવામાં આવે છે.

તે સમયના ગુજરાતના મુખ્યમંત્રી નરેન્દ્ર મોદી અને ગૃહ રાજ્યમંત્રી અમિત શાહના નિર્દેશ બાદ ગુજરાત પોલીસે એસઆઈટી (SIT)ની રચના કરી હતી. પોલીસે માત્ર 19 દિવસમાં ગુજરાત, ઉત્તર પ્રદેશ, મધ્ય પ્રદેશ અને મહારાષ્ટ્રમાં આતંકી નેટવર્કનો પર્દાફાશ કરીને અનેક આરોપીઓની ધરપકડ કરી હતી. અમદાવાદ ઉપરાંત સુરતમાં પણ બૉમ્બ મૂકવામાં આવ્યા હતા, પરંતુ ટેકનિકલ ખામીના કારણે તે ફાટ્યા નહોતા. દેશના ઇતિહાસમાં પહેલી વખત એક જ કેસમાં 38 દોષીઓને એકસાથે ફાંસીની સજા ફટકારવામાં આવી હતી.