Vadodara Monsoon: ચોમાસાની શરૂઆત સાથે વડોદરામાં મગરોની હલચલ વધી, નદીથી સોસાયટી સુધી જોવા મળ્યા મહાકાય મગર

Vadodara Monsoon: ચોમાસાની શરૂઆત થતાં જ વડોદરા અને આસપાસના વિસ્તારોમાં મગરોની હાજરી વધતી જોવા મળી રહી છે. ઢાઢર નદીમાં એકસાથે અનેક મગરો જોવા મળ્યા હતા, જ્યારે શહેરની સોસાયટીમાં પણ મહાકાય મગર ઘૂસી આવ્યો હતો

પ્રતીકાત્મક તસવીર

વડોદરા (Vadodara Monsoon) અને આસપાસના વિસ્તારોમાં ચોમાસાની શરૂઆત થતાં જ નદી અને તળાવ નજીકના વિસ્તારોમાં મગરોની હલચલ વધવા લાગી છે. વરસાદના કારણે નદીઓમાં પાણીનો પ્રવાહ વધતા મગરો રહેણાંક વિસ્તારો અને નદી કાંઠા તરફ આવતા જોવા મળી રહ્યા છે. આવી જ એક ઘટના પાદરા-કરજણ રોડ પર આવેલી ઢાઢર નદીમાં જોવા મળી હતી, જ્યાં પાણીના વહેણ સાથે એકસાથે 11 જેટલા નાના-મોટા મગરો તણાઈ આવતા સ્થાનિકોમાં ચિંતા અને ભયનો માહોલ સર્જાયો હતો. નદીમાં એકસાથે મોટી સંખ્યામાં મગરો જોવા મળતા લોકોમાં આ ઘટના ચર્ચાનો વિષય બની છે.

ઢાઢર નદીમાં મગરોનું ટોળું જોવા મળ્યું, વીડિયો સોશિયલ મીડિયા પર વાયરલ

વડોદરા જિલ્લાના પાદરા-કરજણ રોડ પર આવેલા કોઠવાડા ગામ નજીકથી પસાર થતી ઢાઢર નદીમાં મગરોનો મોટો સમૂહ જોવા મળ્યો હતો. નદીમાં પાણીનો પ્રવાહ વધતા એકસાથે અનેક નાના-મોટા મગરો તરતા જોવા મળ્યા હતા, જેનો વીડિયો સોશિયલ મીડિયા પર ઝડપથી વાયરલ થયો છે.

નદીના તેજ વહેણ વચ્ચે આટલી મોટી સંખ્યામાં મગરોને જોઈને આસપાસના લોકોમાં આશ્ચર્ય સાથે ચિંતા પણ જોવા મળી હતી. પુલ પરથી પસાર થતા વાહનચાલકો અને સ્થાનિક લોકો મગરોના આ દૃશ્યો જોવા માટે થોભી ગયા હતા અને ઘણા લોકોએ પોતાના મોબાઈલમાં આ સમગ્ર ઘટના કેદ કરી હતી.

ચોમાસા (Vadodara Monsoon) દરમિયાન નદીઓમાં પાણીનું સ્તર વધતા ઘણી વખત મગરો તેમના કુદરતી રહેઠાણમાંથી બહાર આવીને અન્ય વિસ્તારોમાં જોવા મળે છે. આવી ઘટનાઓને ધ્યાનમાં રાખીને સ્થાનિકોને સાવચેત રહેવા અને નદી કાંઠાના વિસ્તારોમાં જતી વખતે તકેદારી રાખવાની સલાહ આપવામાં આવે છે.

મગરોની હાજરીથી નદી કાંઠાના વિસ્તારોમાં ચિંતા વધી

આ ઘટનાને પગલે ઢાઢર નદી (Vadodara Monsoon) આસપાસના ગામોમાં રહેતા ખેડૂતો અને પશુપાલકોમાં ભયનો માહોલ જોવા મળી રહ્યો છે. ખાસ કરીને નદી કાંઠાના ખેતરોમાં કામ માટે જતા લોકો અને પશુઓને ચરાવવા જતા પશુપાલકો હવે વધુ સાવચેતી રાખી રહ્યા છે.

સ્થાનિક લોકો દ્વારા માહિતી મળ્યા બાદ વન વિભાગની ટીમ પણ સક્રિય બની છે અને નદીના કાંઠા નજીક ન જવા માટે લોકોને સૂચના આપવામાં આવી છે. અધિકારીઓ દ્વારા લોકોને સાવચેત રહેવા અને મગરો સાથે કોઈપણ પ્રકારની છેડછાડ ન કરવાની અપીલ કરવામાં આવી રહી છે.

વડોદરા જિલ્લામાં ચોમાસા દરમિયાન નદી અને વરસાદી પાણીના કારણે મગરો ઘણી વખત રહેણાંક વિસ્તારો અથવા શહેરી વિસ્તારો નજીક પણ જોવા મળે છે. ઢાઢર નદીમાં મગરોના ઝુંડ બાદ હવે સ્થાનિકો તેમજ તંત્ર બંને સ્થિતિ પર નજર રાખી રહ્યા છે, જેથી કોઈ અનિચ્છનીય ઘટના ન બને.

વડોદરાની સોસાયટીમાં મગરની અચાનક એન્ટ્રી, વન વિભાગે સુરક્ષિત રીતે કર્યું રેસ્ક્યૂ

વડોદરાના વાસણા-ભાયલી રોડ પર આવેલી ‘ગેલેક્સી બંગલોઝ’ સોસાયટીમાં 9 ફૂટ લાંબો વિશાળ મગર ઘૂસી આવતાં અફરાતફરીનો માહોલ સર્જાયો હતો. સોસાયટીના કમ્પાઉન્ડમાં અચાનક આટલો મોટો મગર જોવા મળતા રહેવાસીઓમાં ભય ફેલાયો હતો અને લોકો સાવચેત થઈ ગયા હતા. ઘટનાની જાણ થતાં જ વન વિભાગની ટીમ અને વાઇલ્ડલાઇફ રેસ્ક્યૂ ટીમ સ્થળ પર પહોંચી હતી. ભારે મહેનત બાદ મગરને સુરક્ષિત રીતે પકડીને રેસ્ક્યૂ કરવામાં આવ્યો હતો, ત્યારબાદ સોસાયટીના રહેવાસીઓએ રાહત અનુભવી હતી.

ચોમાસા વચ્ચે વડોદરામાં મગરોની હલચલથી તંત્ર સક્રિય

વડોદરા (Vadodara Monsoon) શહેરના તાંદલજા વિસ્તારમાં પણ મગર જોવા મળ્યાના અહેવાલો સામે આવ્યા છે, જેના કારણે રહેવાસીઓમાં ચિંતા વધી છે. ચોમાસાની શરૂઆત સાથે જ શહેર અને ગ્રામ્ય વિસ્તારોમાં મગરો રહેણાંક વિસ્તારો તરફ આવતા જોવા મળી રહ્યા છે. આવી સ્થિતિમાં વન વિભાગ માટે આગામી દિવસોમાં મગરોના રેસ્ક્યૂ ઓપરેશન અને લોકોને સુરક્ષિત રાખવાનું મોટું પડકારરૂપ કામ બની શકે છે.

તંત્ર દ્વારા લોકોને સાવચેત રહેવા, નદી-નાળા અને પાણી ભરાયેલા વિસ્તારો નજીક જતા સમયે તકેદારી રાખવા તેમજ મગર દેખાય તો તરત જ વન વિભાગને જાણ કરવાની અપીલ કરવામાં આવી રહી છે. ચોમાસા દરમિયાન પાણીના પ્રવાહમાં વધારો થતાં આવી ઘટનાઓ વધી શકે છે, તેથી લોકોની સાવચેતી અને તંત્રની સક્રિયતા બંને ખૂબ જ જરૂરી બની ગઈ છે.