૧૦૦ વર્ષ બાદ પૅરિસે સીન નદી જાહેર જનતા માટે ઓપન કરી

આ નદી ૧૦૦ વર્ષથી ગંદી હતી, હવે એકદમ સ્વચ્છ બની છે અને લોકો એમાં તરી શકશે

સીન નદી

પૅરિસે સીન નદીને જાહેર જનતા માટે ખોલીને મોટી સફળતા મેળવી છે. હવે સામાન્ય લોકો આ નદીમાં તરી શકે છે. ૧૯૨૩ પછી પહેલી વાર આ નદી લોકોને તરવા માટે ખોલવામાં આવી છે. પહેલાં આ નદી ખૂબ ગંદી હતી. પૅરિસે એની સફાઈ પર લગભગ એક અબજ ડૉલર એટલે કે ૮૦૦૦ કરોડ રૂપિયાથી વધુનો ખર્ચ કર્યો છે. ૨૦૨૪ની ઑલિમ્પિક્સનું આયોજન કરવાની બિડ જીત્યા પછી અધિકારીઓએ ૨૦૧૬માં આ કામ શરૂ કર્યું હતું.

આ નદીનું સફાઈકામ ઘણાં વર્ષોથી ચાલી રહ્યું હતું, પરંતુ ૨૦૧૬માં પૅરિસે આ નદીને સાફ કરવાનું કામ ખંતથી શરૂ કર્યું હતું અને એ માટે એણે ૨૦૨૪માં ઑલિમ્પિક્સ રમતોનું આયોજન કરવાની બિડ જીતવી પડી હતી. છેલ્લાં ૧૦૦ વર્ષથી આ નદીમાં ગંદકી અને ગટરનું પાણી પડતું હતું જેને લીધે એમાં ખતરનાક બૅક્ટેરિયાનો વિકાસ થતો હતો. આ કારણસર ૧૯૨૩માં લોકોને આ નદીમાં તરવા પર પ્રતિબંધ મૂકવામાં આવ્યો હતો.