12 September, 2026 02:49 PM IST | London | Gujarati Mid-day Online Correspondent
એકનાથ શિંદેની લંડનમાં વડાપાઉંનો આનંદ માણ્યો (તસવીર: સોશિયલ મીડિયા)
મહારાષ્ટ્રના નાયબ મુખ્યમંત્રી એકનાથ શિંદેની બ્રિટનની બે દિવસીય મુલાકાત શુક્રવારે પૂર્ણ થઈ. આ પ્રવાસ દરમિયાન, શિંદેએ બ્રિટિશ સંસદમાં સંબોધન કર્યું અને અનેક પુરસ્કારો મેળવ્યા. તેમણે રોકાણકારો સાથે મુલાકાત કરી અને મહારાષ્ટ્રમાં વિદેશી રોકાણ આકર્ષવા અંગે ચર્ચા કરી. દરમિયાન, લંડનમાં તેઓ `વડાપાઉં` ખાતા હોય તેવા ફોટા અને વીડિયો વાયરલ થયા છે. શિંદે ભારતીય ક્રિકેટર વિરાટ કોહલીને પણ મળ્યા હતા.
સોશિયલ મીડિયા પર એકનાથ શિંદેનો એક વીડિયો વાયરલ થઈ રહ્યો છે, જેમાં તેઓ લંડનમાં વડાપાઉં ખાતા જોવા મળે છે. તેઓ વડાપાઉંની સાથે લીલા મરચાં પણ ખાતા જોવા મળ્યા હતા. શિવસેનાના નેતા રાહુલ કનાલ તેમની સાથે જોવા મળ્યા હતા. શિંદેની લંડન મુલાકાતના અનેક ફોટા અને વીડિયો સોશિયલ મીડિયા પર સામે આવ્યા છે, જેમાં તેમનો નવો લુક જોવા મળે છે. તેમણે બ્રિટિશ સંસદમાં ‘જય મહારાષ્ટ્ર’નો નારો લગાવ્યો અને યુકેમાં વસતા મરાઠી સમુદાય સાથે સંવાદ કર્યો.
એકનાથ શિંદેને હાઉસ ઓફ લૉર્ડ્સમાં `કૉમનવેલ્થ પબ્લિક લીડરશિપ ઍવોર્ડ` એનાયત કરવામાં આવ્યો હતો. તેમને હાઉસ ઓફ કૉમન્સમાં `સ્ટેટ્સમૅનશિપ ઍવોર્ડ`થી સન્માનિત કરવામાં આવ્યા હતા. આ ઉપરાંત, મરાઠી સમુદાય માટેના એક કાર્યક્રમ દરમિયાન `મહારાષ્ટ્ર મંડળ લંડન` દ્વારા તેમને `ગ્લોબલ પ્રાઈડ ઓફ મહારાષ્ટ્ર` પુરસ્કાર આપવામાં આવ્યો હતો. શિંદેએ રોકાણકારોની બેઠકો અને હાઉસ ઓફ કૉમન્સમાં અંગ્રેજીમાં સંબોધન કર્યું હતું. તેમણે 2030 સુધીમાં મહારાષ્ટ્રને એક ટ્રિલિયન ડૉલરની અર્થવ્યવસ્થામાં પરિવર્તિત કરવાના લક્ષ્યની રૂપરેખા રજૂ કરી હતી.
શિંદેની બ્રિટન મુલાકાત મુખ્યત્વે મહારાષ્ટ્રમાં વિદેશી પ્રત્યક્ષ રોકાણ (FDI) આકર્ષવા અને યુકે સાથેના આર્થિક સંબંધોને મજબૂત કરવા પર કેન્દ્રિત હતી. ભારત અને યુકે વચ્ચેના મુક્ત વેપાર કરાર (Free Trade Agreement) બાદ આર્થિક સહયોગ વધારવા અંગે પણ ચર્ચાઓ કરવામાં આવી હતી. શિંદેની ઓફિસના જણાવ્યા અનુસાર, તેમણે બ્રિટિશ ઉદ્યોગપતિઓ અને રોકાણકારોને મહારાષ્ટ્રમાં રોકાણ કરવા માટે આમંત્રિત કર્યા અને રાજ્યના વિશાળ બજાર, કુશળ કાર્યબળ અને માળખાગત ક્ષમતાઓ પર પ્રકાશ પાડ્યો.
તેમણે મહારાષ્ટ્રના આર્થિક કોરિડોર અને ઔદ્યોગિક ક્લસ્ટરોમાં રોકાણની તકો વિશે પણ ચર્ચા કરી. તેમણે રાજ્યના વિકાસ લક્ષ્યાંકો હાંસલ કરવા માટે મુખ્યમંત્રી દેવેન્દ્ર ફડણવીસ સાથેના સંકલનના મહત્ત્વ પર ભાર મૂક્યો. તેમણે બ્રિટિશ રોકાણકારોને ટૅક્નોલૉજી, ગ્રીન કૅપિટલ અને રોકાણ મહારાષ્ટ્રમાં લાવવા માટે આહ્વાન કર્યું.
આ પ્રવાસ દરમિયાન, શિંદેએ ભારતીય ક્રિકેટર વિરાટ કોહલી અને મૅરિલબોન ક્રિકેટ ક્લબ (MCC) ના સભ્ય સાથે મુલાકાત કરી હતી. મહારાષ્ટ્રના રમતગમત ક્ષેત્રમાં સહયોગ અને તકો અંગે ચર્ચા કરવામાં આવી હતી. મહારાષ્ટ્રના MCC સભ્ય રાહુલ કાલેએ જણાવ્યું હતું કે ઑલમ્પિક્સનું આયોજન ભારતને પાયાના સ્તરે રમતગમતમાં સહભાગિતા વધારવાની અને વિવિધ રમતોની સંસ્કૃતિને મજબૂત કરવાની તક પૂરી પાડી શકે છે. 2036 ઑલમ્પિક્સનું આયોજન કરવાની ભારતની મહત્ત્વાકાંક્ષા પર ભાર મૂકતા, તેમણે રાજ્ય સરકારો અને બ્રિટિશ કંપનીઓ તથા સંસ્થાઓ વચ્ચે સહયોગની આવશ્યકતા પર ભાર મૂક્યો હતો. સમયના અભાવે લૉર્ડ્સ ક્રિકેટ ગ્રાઉન્ડની નિર્ધારિત મુલાકાત રદ કરવામાં આવી હતી. જોકે, રાહુલ કાલેએ શિંદેને 1983 ના વર્લ્ડ કપની અસલ `પ્રુડેન્શિયલ` સ્કોરશીટ, કાર્યક્રમની વિગતો અને એક સ્મૃતિચિહ્ન ભેટમાં આપ્યા હતા.
એકનાથ શિંદે શનિવારે સવારે મુંબઈ પહોંચવાના હતા. જોકે, તકનીકી કારણોસર તેમની ફ્લાઇટ રદ કરવામાં આવી હતી. અહેવાલો અનુસાર, તેઓ હવે નિર્ધારિત સમય કરતાં મોડા મુંબઈ પહોંચશે; પરિણામે, શનિવાર માટેના તેમના તમામ નિર્ધારિત કાર્યક્રમો રદ કરવામાં આવ્યા છે.
