સુશીલા કાર્કી નેપાલનાં પ્રથમ મહિલા વડા પ્રધાન બન્યાં

નવાં વડા પ્રધાનની સ્પષ્ટ વાતઃ જો મારા હાથ-પગ બાંધી દેવામાં આવે તો મને આ કામ કરવામાં રસ નહીં હોય

ગઈ કાલે નેપાલના રાષ્ટ્રપતિભવનમાં સુશીલા કાર્કીએ વડા પ્રધાનપદના શપથ લીધા હતા

હિંસક વિરોધ-પ્રદર્શનો બાદ કે. પી. ઓલી શર્મા ઓલી સરકારના પતન પછી નેપાલમાં રાજકીય અનિશ્ચિતતાનો અંત લાવતાં પ્રેસિડન્ટ રામ ચંદ્ર પૌડેલે ગઈ કાલે રાત્રે સુપ્રીમ કોર્ટનાં ભૂતપૂર્વ મુખ્ય ન્યાયાધીશ સુશીલા કાર્કીને વચગાળાનાં વડા પ્રધાન તરીકે નિયુક્ત કર્યાં હતાં. આમ તેઓ દેશનું નેતૃત્વ કરનાર પ્રથમ મહિલા બન્યાં હતાં. તેમની નિમણૂકની જાહેરાત રાષ્ટ્રપતિના પ્રવક્તા કિરણ પોખરેલ દ્વારા કરવામાં આવી હતી. નેપાલ સંસદ પણ વિસર્જન થવાની તૈયારીમાં છે.

૭૩ વર્ષનાં કાર્કી સામે પહેલું કાર્ય રસ્તાઓ પર હિંસાને કારણે રાજકીય નેતાઓ અને તેમનાં ઘરો અને મિલકતો પર હુમલા થયા પછી વ્યવસ્થા પુનઃસ્થાપિત કરવાનું રહેશે.

અગાઉના દિવસે કાર્કીએ સ્પષ્ટ કર્યું હતું કે જો તેમને ઉચ્ચ સ્થાનો પર ભ્રષ્ટાચાર અને પોલીસ દ્વારા વધુ પડતા બળના ઉપયોગની નિષ્પક્ષ તપાસની મંજૂરી આપવામાં આવે તો જ તેઓ વચગાળાની સરકારનું નેતૃત્વ કરશે. જો મારા હાથ-પગ બાંધી દેવામાં આવે અને હું સંપૂર્ણપણે સ્થિર થઈ જાઉં તો મને આ કામમાં રસ નહીં હોય. કાર્કીએ આ વાત પ્રેસિડન્ટ પૌડેલ દ્વારા આયોજિત એક ઉચ્ચ સ્તરીય બેઠકમાં કહી હતી. આ બેઠકમાં ત્રણ સૌથી મોટા રાજકીય પક્ષો હાજર રહ્યા હતા. એક સૂત્રએ જણાવ્યું હતું કે ત્રણેય ટોચના નેતાઓ ભ્રષ્ટાચાર અને પોલીસ દ્વારા વધુ પડતા બળના ઉપયોગની ઉચ્ચ શક્તિવાળી તપાસ માટે કાર્કીની પૂર્વશરતને સમર્થન આપવા માટે ખૂબ ઉત્સુક નહોતા, કારણ કે તે દેશમાં લોકશાહીના મુખ્ય વાહન, તેમના રાજકીય પક્ષોને બદનામ કરી શકે છે.

જેન-ઝીનાં વિરોધ જૂથોના નેતાઓ અને કાઠમાંડુના મેયર બાલેન્દ્ર શાહે પહેલાંથી જ કાર્કીને વચગાળાની સરકારના વડા તરીકે સમર્થન આપ્યું હતું.