ગ્લાસગોની ભારતીય રેસ્ટોરાંએ માફી માગી, ભૂલ સુધારવાની ખાતરી આપી

એના નૅપકિન પર છપાયેલા ભારતના નકશામાં ઉત્તરપૂર્વનાં રાજ્યોનો સમાવેશ નહોતો અને કાશ્મીરનું પણ યોગ્ય નિરૂપણ નહોતું

લવલીનાએ જોયું હતું કે રેસ્ટોરાંના નૅપકિન પર છપાયેલા અને એના પરિસરની બહાર પ્રદર્શિત ભારતના નકશામાં ઉત્તરપૂર્વનો ઉલ્લેખ કરવામાં આવ્યો નથી

ગ્લાસગોમાં ભારતીય રેસ્ટોરાં ‘ભારત, ધ હોમ ઑફ કરી’એ નૅપકિન્સ પર ભારતનો ખોટો નકશો દર્શાવવા બદલ માફી માગી છે અને ખાતરી આપી છે કે આ ભૂલને સુધારી લેવામાં આવશે. બૉક્સર લવલીના બોર્ગોહેને આ ભૂલ તરફ ધ્યાન દોર્યું હતું.

કોમનવેલ્થ ગેમ્સમાં ૭ ગોલ્ડ અને ૩ સિલ્વર સહિત ૧૦ બૉક્સિંગ મેડલની ઐતિહાસિક જીત બાદ ટીમ ડિનર માટે શનિવારે ‘ભારત, ધ હોમ ઑફ કરી’ રેસ્ટોરાંમાં પહોંચી હતી. આ રેસ્ટોરાં ગ્લાસગોમાં એક જાણીતું ભારતીય ડાઇનિંગ ડેસ્ટિનેશન છે અને વર્ષોથી ઘણી પ્રવાસી ટીમો અને મહાનુભાવો ત્યાં જમવા આવે છે. આસામની ઑલિમ્પિક મેડલવિજેતા લવલીનાએ જોયું હતું કે રેસ્ટોરાંના નૅપકિન પર છપાયેલા અને એના પરિસરની બહાર પ્રદર્શિત ભારતના નકશામાં ઉત્તરપૂર્વનો ઉલ્લેખ કરવામાં આવ્યો નથી. બૉક્સિંગ ફેડરેશન ઓફ ઇન્ડિયા (BFI)ના સભ્યોએ પણ ધ્યાન દોર્યું હતું કે નકશા પર જમ્મુ અને કાશ્મીરને ખોટી રીતે દર્શાવવામાં આવ્યું છે.

આ સંદર્ભમાં BFIના પ્રમુખ અજય સિંહે રવિવારે જણાવ્યું હતું કે મેં અને લવલીનાએ નકશા વિશે રેસ્ટોરાંનું ધ્યાન દોર્યું હતું. તેમણે પોતાની ભૂલ સ્વીકારી હતી અને અમને ખાતરી આપી કે એને સુધારી લેવામાં આવશે.