11 August, 2022 09:09 AM IST | Beijing | Gujarati Mid-day Correspondent
પ્રતીકાત્મક તસવીર
ચીનમાં પ્રાણીઓમાંથી માણસોમાં ફેલાતા વધુ એક વાઇરસના કેસિસ સામે આવ્યા છે. અહીં ૩૫ લોકો લાંગ્યા વાઇરસથી સંક્રમિત થયા છે. ઑથોરિટીઝે જણાવ્યું હતું કે આ પેશન્ટ્સ એકબીજાની સાથે નજીકના કૉન્ટૅક્ટમાં નહોતા કે પછી તેમના સંક્રમણનો કોઈ કૉમન સોર્સ પણ નથી. હાલ ચીનમાં આ વાઇરસના લીધે કોઈનું મૃત્યુ થયું નથી. આ વાઇરસ સૌપ્રથમ ૨૦૧૯માં શેન્ગડોંગમાં માણસોમાં ડિટેક્ટ થયો હતો.
લાંગ્યા હેનિપાવાઇરસ શું છે?
આ વાઇરસના કેસ ચીનના શેન્ગડોંગ અને હેનન પ્રાંતમાં ડિટેક્ટ થયા છે. આ વાઇરસનું પ્રાણીઓમાંથી માણસોમાં સંક્રમણ થઈ શકે છે. માણસોથી માણસોને ચેપ લાગી શકે છે કે નહીં એ જાણવા માટે અત્યારે સ્ટડી કરી રહ્યા છે. છછુંદર આ વાઇરસનો સોર્સ હોવાનું જણાવાયું છે, કેમ કે તાઇવાનમાં કરવામાં આવેલી એક સ્ટડીમાં ૨૭ ટકા છછુંદરમાં આ વાઇરસ ડિટેક્ટ થયો હતો. ચાઇનીઝ સંશોધકોએ પણ ૨૬૨ છછુંદરમાંથી ૭૧માં આ વાઇરસ હોવાનું ડિટેક્ટ કર્યું હતું.
કેવાં લક્ષણો જોવાં મળે છે?
આ વાઇરસથી સંક્રમિત લોકોમાં તાવ, થાક, કફ, ભૂખ ન લાગવી, સ્નાયુઓમાં દુખાવો, ઊબકા, માથાનો દુખાવો અને ઊલટી જેવાં લક્ષણો જોવાં મળ્યાં છે. આ વાઇરસના લીધે વાઇટ બ્લડ સેલ્સમાં પણ ઘટાડો થાય છે. લિવર ફેલ્યર અને કિડની ફેલ્યરની પણ શક્યતા છે.