ચીનમાં શક્તિશાળી ધરતીકંપમાં અનેક બિલ્ડિંગો ધરાશાયી

વહેલી સવારના સમયે મોટા ભાગના રહેવાસીઓ ઊંઘી રહ્યા હતા ત્યારે ભૂકંપ આવ્યો હતો

ધરતીકંપ પછીની સ્થિતિ

સોમવારે વહેલી સવારે ચીનના સધર્ન ગુઆંક્શી વિસ્તારમાં રિક્ટર સ્કેલ પર ૫.૨ની તીવ્રતાનો શક્તિશાળી ભૂકંપ આવતાં ઓછામાં ઓછાં ૧૩ બિલ્ડિંગો ધરાશાયી થઈ ગયાં હતાં. આના પગલે ઓછામાં ઓછા બે લોકોએ જીવ ગુમાવ્યા હતા અને ઘણા લોકો ગુમ થયા હતા. ગુમ થયેલા લોકોની શોધ ચાલુ છે અને હજારો લોકોને આ વિસ્તાર ખાલી કરવાની ફરજ પડી છે. ઇમર્જન્સી મૅનેજમેન્ટ મંત્રાલયે લેવલ-ચારની રાષ્ટ્રીય કટોકટી જાહેર કરીને બચાવટીમો મોકલી આપી છે.

ચાઇના અર્થક્વેક નેટવર્ક્સ સેન્ટરના જણાવ્યા અનુસાર ભૂકંપનું કેન્દ્રબિંદુ લિયુઝોઉ શહેરના લિયુનાન જિલ્લાના તાઇયાંગકુન ટાઉનમાં આશરે ૮ કિલોમીટરની ઊંડાઈએ હતું. વહેલી સવારના સમયે મોટા ભાગના રહેવાસીઓ ઊંઘી રહ્યા હતા ત્યારે ભૂકંપ આવ્યો હતો. લિયુઝોઉ, ગુઇલિન, ગુઇગાંગ, વુઝોઉ, હેચી, નાનિંગ અને લાઇબિન સહિત અનેક શહેરોમાં ભૂકંપના આંચકા અનુભવાયા હતા. લિયુઝોઉ શહેરમાંથી ૭૦૦૦ લોકોને સલામત સ્થળે ખસેડવામાં આવ્યા હતા.