જપાનમાં ૫.૭ની તીવ્રતાના ધરતીકંપથી ભારે ખાનાખરાબી, ૨૦+ લોકો ઘાયલ

મધ્ય જપાનમાં રવિવારે મધરાતે ૧.૦૪ વાગ્યે ૫.૭ની તીવ્રતાનો શક્તિશાળી ભૂકંપ આવતાં ૨૦થી વધુ લોકો ઘાયલ થયા હતા

પ્રતીકાત્મક તસવીર

મધ્ય જપાનમાં રવિવારે મધરાતે ૧.૦૪ વાગ્યે ૫.૭ની તીવ્રતાનો શક્તિશાળી ભૂકંપ આવતાં ૨૦થી વધુ લોકો ઘાયલ થયા હતા. જપાન મીટિયરોલૉજિકલ એજન્સીના જણાવ્યા મુજબ પશ્ચિમી શિઝુઓકા પ્રાંતમાં ૪૦ કિલોમીટરની ઊંડાઈએ ભૂકંપનું કેન્દ્રબિંદુ હતું. આ ભૂકંપને કારણે આઇચી અને શિઝુઓકા પ્રાંતમાં સૌથી વધુ નુકસાન થયું છે. જોકે કોઈ સુનામીની ચેતવણી આપવામાં આવી નથી.
જપાનમાં લોકો ગભરાઈને ઘરની બહાર ભાગતી વખતે દાદર પરથી પડી જતાં ઘાયલ થયા હતા. ક્યોટો, નારા, યામાનાશી અને ગિફુ સુધી ભૂકંપના આંચકા અનુભવાયા હતા, પરંતુ રાજધાની ટોક્યોમાં એની કોઈ અસર થઈ નહોતી. જોકે સ્થાનિક અધિકારીઓએ આગામી બે-ત્રણ દિવસમાં શક્તિશાળી આફ્ટરશૉક આવવાની ચેતવણી આપી હતી. સાવચેતીનાં પગલાંરૂપે શિઝુઓકા અને ગિફુ-હાશિમા સ્ટેશન વચ્ચે શિન્કાનસેન બુલેટ ટ્રેનની ઝડપ ઘટાડવામાં આવી હતી અને કેટલીક લોકલ ટ્રેન રદ કરવામાં આવી હતી.