નેપાલમાં મૃતદેહ પરથી સોનાના દાગીના કાઢતા બે જણની ધરપકડ

તસવીર સૌજન્યઃ સોશ્યલ મીડિયા

બુધવારે આવેલા મહાપૂરમાં જીવ ગુમાવનારી મહિલાના કાનમાંથી સોનાના દાગીના તફડાવતા હોવાના આરોપમાં નેપાલમાં બે પુરુષોની ધરપકડ કરવામાં આવી હતી. પોખરા બસ પાર્ક નજીક પોલીસે બે શંકાસ્પદો પચીસ વર્ષના મદન ગુરુંગ અને ૩૮ વર્ષના ઉમેશ ચૌધરીની ઓળખ કરી હતી અને પછી ધરપકડ કરી હતી.

આ સંદર્ભમાં વાઇરલ થયેલા એક વિડિયોમાં દેખાય છે કે બે પુરુષો પૂરના પાણીમાં મૃત હાલતમાં મળી આવેલી એક મહિલાના શરીર પરથી સોનાની બુટ્ટીઓ કાઢી રહ્યા છે. વિડિયોમાં પુરુષો નારાયણી નદીમાંથી એક મહિલાના શરીરને તેના વાળથી અને લાકડાના પાટિયાની મદદથી ખેંચતા પણ જોવા મળે છે. આ સમયે ઘણા લોકો ત્યાં ઊભા રહેલા પણ જોઈ શકાય છે. 
દાગીનાની ચોરીનો આ વિડિયો જોઈને લોકોએ પ્રતિક્રિયા આપતાં લખ્યું હતું કે ‘કળિયુગ ચરમસીમાએ પહોંચી ગયો છે. માનવતા ઘણા સમય પહેલાં મરી પરવારી હતી, પરંતુ આ એકદમ અમાનવીય છે.’

નેપાલ પોલીસે આ ઘટનાની નિંદા કરી છે અને ભારપૂર્વક જણાવ્યું છે કે આપત્તિ દરમ્યાન લૂંટફાટ અથવા કોઈ પણ પ્રકારના અમાનવીય વર્તનમાં સામેલ થવું સહન કરવામાં આવશે નહીં.