પાકિસ્તાનમાં પિતાએ ૩ વર્ષની દીકરીને ૬૦ વર્ષના વૃદ્ધ સાથે પરણાવવા વેચી દીધી

ઘટના પ્રકાશમાં આવતાં જ પોલીસે પિતાની ધરપકડ કરી છે, જ્યારે વૃદ્ધ સલાહુદ્દીન ફરાર છે.

પ્રતીકાત્મક તસવીર

પાકિસ્તાનના બલૂચિસ્તાન પ્રાંતના ચમન શહેરમાંથી એક અત્યંત ચોંકાવનારી ઘટના સામે આવી હતી. અબ્દુલ બાકી નામના એક પિતાએ પોતાની માત્ર ૩ વર્ષની માસૂમ દીકરીનો ૬૦ વર્ષના વૃદ્ધ સલાહુદ્દીન સાથે અંદાજે ૮.૫૫ લાખ રૂપિયા (૯૦૦૦ ડૉલર)માં સોદો કરી દીધો હતો. ઘટના પ્રકાશમાં આવતાં જ પોલીસે પિતાની ધરપકડ કરી છે, જ્યારે વૃદ્ધ સલાહુદ્દીન ફરાર છે.
બલૂચિસ્તાનના મુખ્ય પ્રધાન મીર સરફરાઝ બુગાટીએ આ ગંભીર ગુનાની તાત્કાલિક તપાસનો આદેશ આપ્યો છે. હાલ બાળકી અને તેની માતા પોલીસરક્ષણ હેઠળ છે. પાકિસ્તાનમાં ‘વલવાર’ નામની પરંપરા હેઠળ કન્યાપક્ષને પૈસા ચૂકવવામાં આવે છે. આ રકમ પૂરી ચૂકવાયા બાદ જ લગ્ન સંપન્ન માનવામાં આવે છે.
આ કેસમાં પોલીસને બીજી એક ચોંકાવનારી કડી મળી છે. પોલીસે જણાવ્યું હતું કે અબ્દુલ બાકીએ તેની મોટી દીકરી શુક્રિયાનાં લગ્ન સલાહુદ્દીનના દીકરા કામરાન સાથે કરાવ્યાં હતાં, પરંતુ કામરાને લોખંડના સળિયાથી ફટકારીને શુક્રિયાની હત્યા કરી નાખી હતી. ત્યાર બાદ અબ્દુલ બાકી પર દબાણ કરવામાં આવ્યું હતું કે તે ઘર ખરીદવા માટે પોતાની નાની દીકરીને પણ આ જ પરિવારમાં પરણાવી દે. બલૂચિસ્તાનમાં બાળલગ્ન કાયદા હેઠળ ગેરકાયદે છે અને એમાં કડક સજાની જોગવાઈ છે.