14 February, 2026 10:33 AM IST | Washington | Gujarati Mid-day Correspondent
પ્રતીકાત્મક તસવીર
અમેરિકાના પ્રેસિડન્ટ ડોનલ્ડ ટ્રમ્પના પ્રશાસન અને અમેરિકાની ટેક જાયન્ટ કંપનીઓ વચ્ચે સંબંધો સારા થઈ રહ્યા હોવાની ચિંતા વચ્ચે ૧૭,૦૦૦ ChatGPT યુઝર્સે તેમનાં સબ્સ્ક્રિપ્શન રદ કરી દીધાં હોવાની જાણકારી મળી રહી છે. OpenAI (આર્ટિફિશ્યલ ઇન્ટેલિજન્સ)ના પ્રમુખ ગ્રેગ બ્રોકમૅન અને તેમનાં પત્નીએ ટ્રમ્પને ટેકો આપતી સુપર પૉલિટિકલ ઍક્શન કમિટી (PAC)ને ૧૨.૫ મિલ્યન ડૉલર (આશરે ૧૧૩ કરોડ રૂપિયા)નું દાન આપ્યું છે. એવું જાણવા મળે છે કે અમેરિકાની ઇમિગ્રેશન એજન્સી ChatGPT 4 દ્વારા સમર્થિત રિઝ્યુમ સ્ક્રીનિંગ ટૂલનો ઉપયોગ કરે છે. આમ કરવાથી યુઝર્સને એમ લાગી રહ્યું છે કે તેમના પર ટ્રમ્પ પ્રશાસન નજર રાખે છે એટલે યુઝર્સ ChatGPTનાં સબ્સ્ક્રિપ્શન રદ કરાવી રહ્યા છે.
ઇન્સ્ટાગ્રામ અને રેડિટ પર ક્વિટ ChatGPT ઝુંબેશ ઝડપથી ગતિ પકડી રહી છે, જ્યાં યુઝર્સ તેમનાં રદ કરાયેલાં સબ્સ્ક્રિપ્શન્સના સ્ક્રીનશૉટ્સ પોસ્ટ કરી રહ્યા છે. સબ્સ્ક્રિપ્શન્સ છોડનારાઓમાં ક્લાઇમેટ ઑર્ગેનાઇઝર્સ, લેબર ઍડ્વોકેટ્સ અને ટેક વર્કર્સનો પણ સમાવેશ થાય છે. આ ઝુંબેશની પ્રેરણા માર્કેટિંગ પ્રોફેસર સ્કૉટ ગેલોવેના એક વિડિયોમાંથી મળી હતી. તેમણે કહ્યું કે સબ્સ્ક્રિપ્શન રદ કરવાથી કંપનીઓને સંદેશ જઈ શકે છે કે જે સરકારી નીતિઓનું જનતા દ્વારા સ્વાગત કરવામાં આવતું નથી એને ટેકો આપવાથી નાણાકીય નુકસાન થશે.
હાલમાં OpenAIએ QuitGPT ઝુંબેશ પર કોઈ કમેન્ટ કરી નથી અને એની અસર શું થશે એ શોધવાનું ત્યારે જ શક્ય બનશે જ્યારે OpenAI અથવા સૅમ ઑલ્ટમૅન આ મુદ્દા પર ધ્યાન આપશે.
