30 August, 2025 11:07 AM IST | Kyiv | Gujarati Mid-day Correspondent
યુક્રેનમાં યુરોપિયન યુનિયન અને બ્રિટિશ કાઉન્સિલનાં બિલ્ડિંગો પર રશિયાનો હુમલો
રશિયાએ રાતોરાત કરેલા હુમલાઓમાં યુરોપિયન યુનિયન (EU)ના રાજદ્વારી મિશન અને કિએવમાં બ્રિટિશ કાઉન્સિલનાં બિલ્ડિંગોને નુકસાન પહોંચાડ્યું હતું. આ ઘટના પર કમેન્ટ કરતાં યુક્રેનના પ્રેસિડન્ટ વૉલોદિમીર ઝેલેન્સ્કીએ કહ્યું હતું કે ‘મૉસ્કોએ આ હુમલાનું પરિણામ ભોગવવું પડશે. રશિયા યુદ્ધ સમાપ્ત કરવાનું પસંદ કરી રહ્યું નથી.’
યુક્રેનની રાજધાનીમાં થયેલો આ હુમલો યુદ્ધનો બીજો સૌથી મોટો હવાઈ હુમલો માનવામાં આવે છે, જેમાં ૪ બાળકો સહિત ઓછામાં ઓછા ૧૯ લોકોએ જીવ ગુમાવ્યો હતો. યુનાઇટેડ કિંગડમના વડા પ્રધાન કીર સ્ટાર્મરે આ હુમલાઓની નિંદા કરીને રશિયન પ્રેસિડન્ટ વ્લાદિમીર પુતિન પર શાંતિની આશાઓને તોડી પાડવાનો આરોપ લગાવ્યો હતો. વાઇટ હાઉસમાં મીડિયા બ્રીફિંગ દરમ્યાન પ્રેસ-સેક્રેટરી કૅરોલિન લેવિટે જણાવ્યું હતું કે પ્રેસિડન્ટ ડોનલ્ડ ટ્રમ્પ રશિયન હુમલાઓથી ખુશ નથી, પણ તેમને આ હુમલાથી આશ્ચર્ય પણ થયું નથી.