જુહુની રેત પર કૅમેરામાં કેદ થયેલી નોખી-અનોખી શ્વાનકથા લોકાર્પણ

આમ તો શહેરમાં જાતજાતનાં પુસ્તકનાં લોકાર્પણ થતાં રહે છે, પણ તાજેતરમાં મુંબઈમાં એક નોખા-અનોખા પુસ્તકનો લોકાર્પણ-સમારોહ યોજાયો હતો

રવિવારે ૧૨ એપ્રિલે મુંબઈમાં સાપ્તાહિક ‘ચિત્રલેખા’ના ચૅરમૅન મૌલિક કોટકે મુંબઈના જુહુ બીચ પર ઝડપેલી ડૉગ્ઝની તસવીરોના કૉફીટેબલ બુક ‘પેટ્સ ઑન જુહુ બીચ’ના વિમોચન-પ્રસંગની તસવીરમાં (ડાબેથી) ઇન્વેસ્ટમેન્ટ બૅન્કર-વેન્ચર કૅપિટલિસ્ટ વલ્લભ ભણસાલી, જાણીતા કાર્ડિઍક સર્જ્યન ડૉ. રમાકાન્ત પાંડા, પ્રખ્યાત લેખક-નિર્માતા-દિગ્દર્શક વિપુલ અમૃતલાલ શાહ, મૌલિક કોટક, રાજુલ કોટક અને મનન કોટક.

આમ તો શહેરમાં જાતજાતનાં પુસ્તકનાં લોકાર્પણ થતાં રહે છે, પણ તાજેતરમાં મુંબઈમાં એક નોખા-અનોખા પુસ્તકનો લોકાર્પણ-સમારોહ યોજાયો હતો. સાપ્તાહિક ‘ચિત્રલેખા’ના ચૅરમૅન મૌલિક કોટકે જુહુ બીચ પર ઝડપેલી જાતજાતના શ્વાનોની તસવીરોનો સંગ્રહ. પુસ્તકનું શીર્ષક છે ‘પેટ્સ ઑન જુહુ બીચ’.

સમારોહના અતિથિવિશેષ હતા ઇન્વેસ્ટમેન્ટ બૅન્કર-વેન્ચર કૅપિટલિસ્ટ વલ્લભ ભણસાલી, જાણીતા કાર્ડિઍક સર્જ્યન ડૉ. રમાકાંત પાંડા, પ્રખ્યાત લેખક-નિર્માતા-દિગ્દર્શક વિપુલ અમૃતલાલ શાહ. ‘ચિત્રલેખા’ના વાઇસ ચૅરમૅન મનન કોટક અને તેમનાં પુત્રી તનાયા કોટકે સ્કિટ સ્વરૂપે આમંત્રિતોને આવકાર્યા એ પણ એક સુખદ આશ્ચર્ય હતું.

પુસ્તકમાં પ્રકાશિત મૌલિકભાઈની દરેક ક્લિકના અવાજ પાછળ એક વાર્તા છે ઃ ખુશીની, સંતોષની, અનુકંપાની, એકાંતની, તો ક્યારેક નિઃશબ્દ દોસ્તીની. પુસ્તકમાં માત્ર તસવીરો નથી, પણ લાગણીનાં એવાં સ્પંદન છે જે સીધાં અંતરતાર ઝણઝણાવી જાય છે. એમાં લાગણીનો દરિયો ઘૂઘવાય છે.

જોકે આ લોકાર્પણ માત્ર કૉફીટેબલ બુકનું જ નહોતું. એ તો માણસ અને પ્રાણી વચ્ચે રચાઈ જતા લાગણીઓના, સંબંધોના નિષ્કપટ જોડાણનું હતું. એવું જોડાણ જે એક શબ્દની લે-આપ વિના રચાય છે. મૌલિકભાઈએ માત્ર જીવંત ક્ષણોને નહીં પણ માણસ અને તેના પાળેલા પ્રાણી વચ્ચેના નિઃશબ્દ પ્રેમને, અતૂટ સંબંધને કેદ કર્યા છે.