ભાઈની સાથે મળીને ચૂંટણી લડવી હોય તો પોતાના હિસ્સામાંથી MNSને સીટો આપજો

રાજ ઠાકરેને MVAમાં લઈ આવવાની ચર્ચા વચ્ચે કૉન્ગ્રેસે ઉદ્ધવ ઠાકરેને સંદેશ મોકલ્યો

રાજ ઠાકરે અને ઉદ્ધવ ઠાકરેની તસવીરોનો કૉલાજ (સૌજન્ય મિડ-ડે)

મહારાષ્ટ્ર નવનિર્માણ સેના (MNS)ના ઉત્તર ભારતીયોના સ્ટૅન્ડને લઈને એને મહા વિકાસ આઘાડી (MVA)માં લેવા કૉન્ગ્રેસ તૈયાર ન હોવાની ચર્ચા રાજકીય વર્તુળોમાં જોરશોરમાં ચાલી રહી છે. કૉન્ગ્રેસનાં મુંબઈ-પ્રમુખ વર્ષા ગાયકવાડે તો BMCની ચૂંટણી કૉન્ગ્રેસ એકલા હાથે લડશે એવી જાહેરાત પણ કરી દીધી છે.

જોકે મહા વિકાસ આઘાડીના ત્રીજા સાથી પક્ષ નૅશનલિસ્ટ કૉન્ગ્રેસ પાર્ટી (શરદ પવાર)એ આ બાબતે હજી મગનું નામ મરી નથી પાડ્યું. આ દરમ્યાન કૉન્ગ્રેસના એક નેતાએ એવી વાત વહેતી મૂકી છે કે જો શિવસેના (UBT) MNSને સાથે લઈને ચૂંટણી લડવા માગતી હોય તો MVAની સીટ-શૅરિંગમાં જેટલી બેઠકો શિવસેના (UBT)ના ફાળામાં આવે એમાંથી ઉદ્ધવ ઠાકરે MNS સાથે બેઠકો શૅર કરી શકે છે. છેલ્લે નિર્ણય તો ઉદ્ધવ અને રાજે જ લેવાનો છે કે એ રીતે તેમણે ચૂંટણી લડવી છે કે નહીં.