22 May, 2026 09:05 AM IST | Mumbai | Gujarati Mid-day Correspondent
રોહિત શેટ્ટી
ફિલ્મમેકર રોહિત શેટ્ટીના ઘરની બહાર બિશ્નોઈ ગૅન્ગના સભ્યોએ ફાયરિંગ કર્યું એ કેસની મુંબઈ પોલીસ દ્વારા દાખલ કરવામાં આવેલી ચાર્જશીટમાં રસપ્રદ તથ્યો સામે આવ્યાં છે. રોહિત શેટ્ટીના ઘરની બહાર ફાયરિંગ થયું ત્યારે ગૅન્ગ્સ્ટર લૉરેન્સ બિશ્નોઈનો ભાઈ અનમોલ બિશ્નોઈ આરોપી સાથે લાઇવ વિડિયો કૉલ પર હતો અને ઇન્સ્ટ્રક્શન આપી રહ્યો હતો.
સ્પેશ્યલ મહારાષ્ટ્ર કન્ટ્રોલ ઑફ ઑર્ગેનાઇઝ્ડ ક્રાઇમ ઍક્ટ (MCOCA) કોર્ટમાં દાખલ કરવામાં આવેલી ૧૬૨૪ પાનાંની ચાર્જશીટમાં ફાયરિંગ કરનાર પ્રદીપ કુમાર સહિત કુલ ૧૭ આરોપીઓનાં નામ છે. પોલીસનું માનવું છે કે ફાયરિંગની ઘટના બિશ્નોઈ ગૅન્ગના નામની ધાક જમાવવા માટે યોજનાપૂર્વક પાર પાડવામાં આવી હતી.
આરોપીએ ૧૦ દિવસ અગાઉ પણ હુમલાનો પ્રયત્ન કર્યો હતો
ચાર્જશીટમાં જણાવાયા અનુસાર આરોપી પ્રદીપ કુમારે ઘટનાના ૧૦ દિવસ પહેલાં પણ હુમલાનો પ્રયત્ન કર્યો હતો. એ દિવસે ૩૦ મિનિટ સુધી રોહિત શેટ્ટીના ઘરની બહાર રાહ જોઈને તે ઊભો હતો, પરંતુ હુમલો કરવાની હિંમત ન થતાં ભાગી ગયો હતો જેને પગલે અનમોલ બિશ્નોઈ પ્રદીપ કુમાર પર રોષે ભરાયો હતો. ત્યાર બાદ ૧ ફેબ્રુઆરીએ ફરી હુમલાની યોજના બની હતી અને એ વખતે પ્રદીપ કુમાર ફાયરિંગ કર્યા વગર પાછો ન આવે એ માટે વિડિયો કૉલ પર અનમોલ બિશ્નોઈ સતત તેને સૂચના આપીને તેની હિંમત વધારતો હતો.
