અટલ સેતુ પરથી પસાર થતાં ઇલેક્ટ્રિક વાહનો હવે ટોલમુક્ત

સ્ટેટ અને નૅશનલ હાઇવે પર ટૂંક સમયમાં ૫૦ ટકા ટોલમાફી લાગુ કરવામાં આવશે

અટલ સેતુની ફાઇલ તસવીર

મહારાષ્ટ્રની ઇલેક્ટ્રિક વ્હીકલ પૉલિસી અંતર્ગત અટલ સેતુ પરથી પસાર થતાં ઇલેક્ટ્રિક વાહનોને ટોલમાફી મળશે. ટોલમાફીમાં તમામ પ્રકારનાં સરકારી અને પ્રાઇવેટ ફોર-વ્હીલર વાહનોનો સમાવેશ થાય છે. પબ્લિક વર્ક્‍સ ડિપાર્ટમેન્ટ (PWD) હેઠળ આવતા સ્ટેટ અને નૅશનલ હાઇવે પર ૫૦ ટકા ટોલમાફી લાગુ કરવામાં આવશે, જેમાં સમૃદ્ધિ મહામાર્ગ અને મુંબઈ-પુણે હાઇવેનો સમાવેશ થાય છે.

એપ્રિલ મહિનામાં પ્રસ્તાવિત આ પૉલિસીનો અમલ શુક્રવારથી શરૂ કરવામાં આવ્યો છે. કાર્બન-ઉત્સર્જનને ઘટાડીને ટ્રાન્સપોર્ટ સિસ્ટમને સ્વચ્છ બનાવવાનું પ્રોત્સાહન આપવા માટે મહારાષ્ટ્ર સરકારે ઇલેક્ટ્રિક વાહનોને ટોલમુક્ત કરવાની પૉલિસી રજૂ કરી હતી. પ્રાઇવેટ ઇલેક્ટ્રિક કાર, પૅસેન્જર ફોર-વ્હીલર, સ્ટેટ ટ્રાન્સપોર્ટની બસ તેમ જ શહેરી પબ્લિક ટ્રાન્સપોર્ટનાં ઇલેક્ટ્રિક વાહનોને ટોલમુક્તિનો લાભ મળશે જ્યારે માલવાહક ઇલેક્ટ્રિક વાહનોને આ લાભ મળશે નહીં.

નવી મુંબઈને મુંબઈ સાથે જોડતા ૨૧.૮ કિલોમીટર લાંબા અટલ સેતુ પરથી રોજ આશરે ૩૪,૦૦૦થી ૪૦,૦૦૦ વાહનો પસાર થાય છે, એનો વન-વે ટોલ ૨૫૦ રૂપિયા છે. ઇલેક્ટ્રિક વાહનો માટે હવે આ ટોલ માફ કરાયો છે.