ગાદલાં અને પાનાંની ફૅક્ટરીમાં ભીષણ આગ! જાનહાનિ નહીં પણ માલ બળીને ખાખ

આગની જ્વાળાઓમાં આસપાસનાં ૬થી ૭ યુનિટ હોમાયાં હતાં. ફાયર-બ્રિગેડે મોડી સાંજે આગ પર કાબૂ મેળવ્યો હતો.

પ્રતીકાત્મક તસવીર

ભિવંડીમાં આવેલા હરિહર કમ્પાઉન્ડમાં બે માળના બિલ્ડિંગમાં ગઈ કાલે ભીષણ આગ લાગી હતી. આ બિલ્ડિંગમાં બૉમ્બે ટ્રોફી નામની કંપની હતી જે કાપડનાં ગાદલાં અને કાગળના રોલ બનાવતી હતી. આ આગ બાજુના યુનિટમાં પણ પ્રસરી હતી. આ યુનિટમાં રમવાનાં પાનાં બનતાં હતાં. એ યુનિટ પણ આગની ઝપેટમાં આવી ગયું હતું. કપડાં અને કાગળ જેવી જલદી આગ પકડે એવી વસ્તુઓને કારણે આ આગ બેકાબૂ બની હતી. એમાં કોઈ જાનહાનિ નોંધાઈ નહોતી, પણ આગની જ્વાળાઓમાં આસપાસનાં ૬થી ૭ યુનિટ હોમાયાં હતાં. ફાયર-બ્રિગેડે મોડી સાંજે આગ પર કાબૂ મેળવ્યો હતો.