BMC Gen Z Fellowship 2026: 50 બેઠકો માટે અરજી શરૂ, મળશે ₹61,500નું સ્ટાઇપેન્ડ

BMCએ Gen Z Fellowship Programme 2026 માટે અરજી મગાવી છે. 28 વર્ષથી ઓછી ઉંમરના ગ્રૅજ્યુએટ્સ 31 ઑગસ્ટ સુધી અરજી કરી શકે છે. કુલ 50 ઉમેદવારોની પસંદગી થશે.

પ્રતીકાત્મક તસવીર (એઆઇ)

બૃહન્મુંબઈ મ્યુનિસિપલ કૉર્પોરેશન (BMC)એ યુવા ગ્રૅજ્યુએટ્સ માટે ‘BMC Gen Z Fellowship Programme 2026’ની જાહેરાત કરી છે. એક વર્ષના આ ફેલોશિપ પ્રોગ્રામ માટે કુલ 50 ઉમેદવારોની પસંદગી કરવામાં આવશે. પસંદ થયેલા ઉમેદવારોને ₹61,500નું સ્ટાઇપેન્ડ આપવામાં આવશે. અરજી કરવાની છેલ્લી તારીખ 31 ઑગસ્ટ 2026 છે. આ ફેલોશિપ દ્વારા યુવાનોને BMCની વહીવટી કામગીરીને નજીકથી સમજવાની અને મુંબઈના વિકાસ સાથે સંકળાયેલી વિવિધ યોજનાઓમાં યોગદાન આપવાની તક મળશે. BMCએ સોશિયલ મીડિયા પર આ કાર્યક્રમની જાહેરાત કરતાં તેને યુવાનો માટે ‘સુવર્ણ તક’ ગણાવી છે.

ફેલોશિપમાં શું શીખવા મળશે?

પસંદગી પામેલા ઉમેદવારોને નાગરિક વહીવટ, નીતિઓના અમલીકરણ, પ્રોજેક્ટ પ્લાનિંગ, ડેટા વિશ્લેષણ, રિપોર્ટ તૈયાર કરવા અને વિવિધ વિભાગો વચ્ચેના વહીવટી સંકલન જેવી કામગીરીનો પ્રત્યક્ષ અનુભવ મળશે. આ ઉપરાંત ઉમેદવારોને નીતિ ઘડનારાઓ અને BMCના વરિષ્ઠ અધિકારીઓ સાથે કામ કરવાની તક મળશે. ફેલોશિપ દરમિયાન તેઓ પોતાના  નેતૃત્વસંવાદ અને વહીવટી કૌશલ્યો વિકસાવી શકશે. ફેલોશિપ સફળતાપૂર્વક પૂર્ણ કરનાર ઉમેદવારોને પ્રમાણપત્ર પણ આપવામાં આવશે.

કોણ કરી શકશે અરજી? 

આ ફેલોશિપમાં ભાગ લેવા માટે બીએમસી દ્વારા કેટલાક ચોક્કસ માપદંડો નક્કી કરવામાં આવ્યા છે, જેનું પાલન કરવું આવશ્યક છે:

શૈક્ષણિક લાયકાત: અરજી કરનાર ઉમેદવાર કોઈપણ માનવશાસ્ત્ર કે પ્રવાહમાંથી સ્નાતક (Graduate) થયેલ હોવો જોઈએ.

વય મર્યાદા: અરજદારે 28 વર્ષથી ઓછી વયના હોવું ફરજિયાત છે.

ભાષાનું પ્રભુત્વ: ઉમેદવારને મરાઠી ભાષા વાંચતા, લખતા અને બોલતા ચોક્કસ આવડવું જોઈએ. આ ઉપરાંત હિન્દી અને અંગ્રેજી ભાષાનું પર્યાપ્ત જ્ઞાન હોવું પણ જરૂરી છે.

ટેકનિકલ કુશળતા: આધુનિક વહીવટી કામગીરીને ધ્યાનમાં રાખીને ઉમેદવારો પાસે કમ્પ્યુટર ઓપરેશન્સ અને ઈન્ટરનેટનું મૂળભૂત જ્ઞાન હોવું અનિવાર્ય છે.

50 બેઠકો, એક વર્ષનો કાર્યકાળ

આ ફેલોશિપનો કાર્યકાળ 12 મહિનાનો રહેશે અને કુલ 50 ઉમેદવારોની પસંદગી કરવામાં આવશે. અરજી માટે ઉમેદવારોએ ₹500 ફી ચૂકવવાની રહેશે. ફેલો તરીકે પસંદ થયેલા ઉમેદવારો BMCના નિયમિત કર્મચારી ગણાશે નહીં અને તેમની નિમણૂક નિશ્ચિત સમયગાળા માટે કરવામાં આવશે.

અરજી કરવાની છેલ્લી તારીખ

ફેલોશિપ માટે ઑનલાઇન અરજી પ્રક્રિયા 19 ઑગસ્ટ 2026થી શરૂ થઈ છે. લાયક ઉમેદવારો 31 ઑગસ્ટ 2026 સુધી અરજી કરી શકશે. અરજી કરતી વખતે તમામ વિગતો ચોક્કસ રીતે ભરવા અને જરૂરી દસ્તાવેજો જોડવા ઉમેદવારોને સૂચના આપવામાં આવી છે. રસ ધરાવતા ઉમેદવારો BMCના સત્તાવાર રિક્રૂટમેન્ટ પોર્ટલ https://bmc.recruitlive.in/#/login  પરથી ઑનલાઇન અરજી કરી શકે છે. આ ફેલોશિપ યુવા ગ્રૅજ્યુએટ્સને દેશની સૌથી મોટી મ્યુનિસિપલ કૉર્પોરેશનની કામગીરીનો પ્રત્યક્ષ અનુભવ મેળવવાની સાથે મુંબઈના ભાવિ વિકાસમાં ભાગીદાર બનવાની તક આપશે.

દેશની આર્થિક રાજધાની મુંબઈ સતત બદલાતાં શહેરી પડકારોનો સામનો કરી રહી છે. ટ્રાફિક, કચરા વ્યવસ્થાપન, આરોગ્ય, શિક્ષણ, પર્યાવરણ અને નાગરિક સુવિધાઓ જેવા ક્ષેત્રોમાં યુવાનોના નવા વિચારો અને ટેક્નૉલૉજીની સમજ ઉપયોગી બની શકે છે. આ ફેલોશિપ દ્વારા BMCને Gen Zનો તાજો દૃષ્ટિકોણ મળશે, જ્યારે યુવાનોને નીતિ-નિર્માણ અને વહીવટનો પ્રત્યક્ષ અનુભવ થશે. યુવા પ્રતિભા અને અનુભવી વહીવટી તંત્રનો આ સમન્વય મુંબઈને વધુ કાર્યક્ષમ, સમાવેશી અને ભવિષ્ય માટે સજ્જ શહેર બનાવવામાં મદદરૂપ થઈ શકે છે.