ડુપ્લિકેટ નામોની તપાસ કરવા BMCએ ડોર-ટુ-ડોર વેરિફિકેશન ડ્રાઇવ શરૂ કરી

ડ્રાફ્ટ વોટર-લિસ્ટમાં જોવા મળેલાં ૧૦ લાખથી વધુ ડબલ નામ દૂર કરવાની કવાયત શરૂ

પ્રતીકાત્મક તસવીર

બૃહન્મુંબઈ મ્યુનિસિપલ કૉર્પોરેશન (BMC)એ BMCના ઇલેક્શન માટેના ડ્રાફ્ટ વોટર-લિસ્ટમાં સુધારો કરવા ડોર-ટુ-ડોર વેરિફિકેશન ડ્રાઇવ શરૂ કરી છે. BMC તરફથી એવું જાણવા મળ્યું હતું કે વોટર-લિસ્ટમાં ડુપ્લિકેટ નામોની તપાસ માટે આ ડ્રાઇવ શરૂ કરવામાં આવી છે, પણ ઇલેક્શન ઑફિસરોને કેટલાક લોકો અને હાઉસિંગ સોસાયટીઓમાં વિરોધનો સામનો કરવો પડે છે જેને કારણે વેરિફિકેશનમાં પણ અડચણ આવી રહી છે. 

BMCએ વેરિફિકેશનની આ પ્રક્રિયામાં સ્ટાફ તથા બૂથ લેવલ ઑફિસર (BLO)ને સહયોગ કરવા માટે તમામ હાઉસિંગ સોસાયટીઓ તથા નાગરિકોને અપીલ કરી હતી. BMC તરફથી આ માટે સોસાયટીના ચૅરમૅન-સેક્રેટરીને ઑફિશ્યલ મેસેજ પણ મોકલવામાં આવશે.

સ્ટેટ ઇલેક્શન કમિશને આ ડ્રાફ્ટ વોટર-લિસ્ટમાં અમુક નામો સામે બે વાર ફૂદડી કરીને એ નામો એકથી વધુ વાર હોવાનું દર્શાવ્યું છે. BMCએ આવાં ડુપ્લિકેટ નામોને દૂર કરવા ગ્રાઉન્ડ પર સ્ટાફને કામગીરી સોંપી છે કે તેઓ સૌથી પહેલાં આ મતદારોની ખાતરી કરે, પછી તેઓ ખરેખર કયા સરનામે છે અને કયા મતદાનમથકથી વોટિંગ કરવા માગે છે એ જાણે.

કેમ શરૂ કરવી પડી વેરિફિકેશન ડ્રાઇવ?
આ ડ્રાફ્ટ મતદારયાદીમાં ૧૦ લાખથી વધુ ડુપ્લિકેટ નામો મળ્યાં હોવાની ફરિયાદો ઊઠી છે એટલું જ નહીં; એમાંથી ૪.૩૩ લાખ મતદારોનાં નામ તો બેથી વધુ વખત હતાં, જ્યારે એક યુનિક કિસ્સામાં તો એક મતદારનું નામ ૧૦૩ વાર જોવા મળ્યું હતું.