24 February, 2026 11:09 AM IST | Mumbai | Gujarati Mid-day Correspondent
પ્રતીકાત્મક તસવીર
મુંબઈની સવાર ગાઢ ધુમ્મસ સાથે થાય છે, બપોર થતાં ઉનાળા જેવી ગરમી અનુભવાય છે અને સાંજે પ્રદૂષણ માઝા મૂકે છે. જોકે ફેબ્રુઆરી મહિનો મુંબઈગરા માટે મિક્સ સીઝનનો રહ્યો છે. ગયા સપ્તાહના અંતમાં તાપમાનનો પારો ૩૫ ડિગ્રીને પાર કરી જતાં ફેબ્રુઆરી મહિનાના સૌથી ગરમ દિવસનો અનુભવ થયો હતો.
પૉલ્યુશન કન્ટ્રોલ બોર્ડના ડેટા મુજબ બાંદરા, સાંતાક્રુઝ અને વરલી જેવા વિસ્તારોમાં ઍર ક્વૉલિટી ઇન્ડેક્સ (AQI) મધ્યમથી ઉપર જ રહે છે, પણ સારી વાત એ છે કે બાકીના વિસ્તારોમાં AQI નબળી કક્ષાથી સુધરીને મધ્યમ રેન્જમાં પહોંચ્યો છે. આ અઠવાડિયાના અંત સુધીમાં ગરમીનો પારો યથાવત્ રહેવાની સંભાવના છે. મહત્તમ તાપમાન ૩૩થી ૩૪ ડિગ્રી અને લઘુતમ તાપમાન ૨૧ ડિગ્રીની આસપાસ રહેશે.
અરેબિયન સીમાં લો પ્રેશરને કારણે મહારાષ્ટ્રના મરાઠવાડા અને વિદર્ભમાં ગઈ કાલે કમોસમી વરસાદ પડ્યો હતો અને વર્ધામાં બરફના કરા પડ્યા હતા. કમોસમી વરસાદને કારણે ફળ અને ફૂલની ખેતીને વધુ નુકસાન પહોંચ્યું હતું.
ગરમી અને પ્રદૂષણને કારણે અત્યારે સૌથી વધારે બોર્ડની એક્ઝામના વિદ્યાર્થીઓને મુશ્કેલી થઈ રહી છે. બારમીની સ્ટુડન્ટ વિધિ સુરેલિયાએ ‘મિડ-ડે’ને કહ્યું હતું કે ‘હું દહિસરમાં રહું છું અને મારું એક્ઝામ સેન્ટર જુહુમાં છે એટલે ટ્રાફિકથી બચવા મારા પપ્પા ટૂ-વ્હીલર પર મૂકવા આવે છે. મને પહેલેથી જ સાઇનસની સમસ્યા છે એટલે ધૂળ અને પ્રદૂષણને લીધે સેન્ટર પર પહોંચતાં પહેલાં જ શ્વાસની તકલીફ થાય છે, પણ એક્ઝામ આપીને હું ટ્રેનમાં જ પાછી આવું છું એટલે પૉલ્યુશનથી બચી શકાય છે.’
