મરાઠીભાષી મેયરની માગણી કરનાર મરાઠી એકીકરણ સમિતિના કાર્યકરો સામે બે મહિના પછી પોલીસ-કાર્યવાહી

વાસ્તવિક ઘટનાના બે મહિના પછી નોટિસ બજાવવામાં આવી રહી હોવાથી કાર્યકરો રોષે ભરાયા છે

પ્રતીકાત્મક ફાઇલ તસવીર

મીરા-ભાઈંદર મ્યુનિસિપલ કૉર્પોરેશન (MBMC)માં મરાઠીભાષી મેયરની માગણી માટે વિરોધ-પ્રદર્શન કરનારા મરાઠી એકીકરણ સમિતિના કાર્યકરો સામે ભાઈંદર પોલીસે કેસ નોંધ્યો છે. આ કાર્યવાહીથી કાર્યકરોમાં રોષ ફેલાયો છે. વાસ્તવિક ઘટનાના બે મહિના પછી નોટિસ બજાવવામાં આવી રહી હોવાથી કાર્યકરો રોષે ભરાયા છે.

મેયરપદના નામાંકન વિશે વિવાદ

આ વિવાદ જાન્યુઆરીમાં યોજાયેલી MBMCની ચૂંટણીથી ઉદ્ભવ્યો છે. ચૂંટણીમાં ભારતીય જનતા પાર્ટી (BJP)એ વિજય મેળવ્યો હતો. જીત્યા બાદ પાર્ટીએ મેયરપદ માટે ડિમ્પલ મહેતાને નૉમિનેટ કર્યાં હતાં, પણ મરાઠી એકીકરણ સમિતિએ આ પસંદગીનો વિરોધ કર્યો હતો, કારણ કે ડિમ્પલ મહેતા મરાઠીભાષી નથી.

પરવાનગી નકાર્યા છતાં વિરોધ-પ્રદર્શન યોજાયું

મેયરપદની ચૂંટણીપ્રક્રિયા દરમ્યાન ૩ ફેબ્રુઆરીએ સમિતિએ વિરોધ-પ્રદર્શન કરવાનો નિર્ણય લીધો હતો. કાયદો અને વ્યવસ્થાની પરિસ્થિતિ વણસી શકે એવી શંકા જતાં પોલીસે પરવાનગી નકારી હોવા છતાં વિરોધીઓ ભાઈંદર-વેસ્ટમાં સુભાષ ચંદ્ર બોઝ ગ્રાઉન્ડ પાસે એકઠા થયા હતા. પ્રદર્શન કરનારાઓએ સૂત્રોચ્ચાર કરીને વિરોધ દર્શાવી BJPના નિર્ણય સામે પોતાની અસંમતિ વ્યક્ત કરીને મ્યુનિસિપલ કૉર્પોરેશનના હેડક્વૉર્ટર તરફ કૂચ કરવાનો પ્રયાસ કર્યો હતો. પોલીસે સમિતિના પદાધિકારીઓ સામે ગુનો નોંધ્યો છે. તેમણે બે મહિના મોડી નોટિસ બજાવવામાં આવી રહી છે એ બદલ ગુસ્સો વ્યક્ત કર્યો છે.