06 May, 2026 07:08 AM IST | Mumbai | Samiullah Khan
ચારકોપ પોલીસની કસ્ટડીમાં આરોપી મોહમ્મદ રઈસ શમ્સુલ્લા શાહ અને તેની પાસેથી જપ્ત કરવામાં આવેલાં પાંચ ટૂ-વ્હીલર.
ચારકોપ પોલીસે કાંદિવલીમાં એક અસામાન્ય બાઇકચોરીના રૅકેટનો પર્દાફાશ કર્યો છે જ્યાં ચોરાયેલાં ટૂ-વ્હીલર વેચવામાં નહોતાં આવતાં પણ ડિલિવરી-એજન્ટોને ભાડે આપવામાં આવતાં હતાં. ૨૩ વર્ષના આરોપીની ધરપકડ કરવામાં આવી છે અને તેની પાસેથી ચોરાયેલાં પાંચ ટૂ-વ્હીલર જપ્ત કરવામાં આવ્યાં છે જેને કારણે છેલ્લાં બે વર્ષમાં નોંધાયેલા પાંચ કેસ ઉકેલાઈ ગયા છે.
ધરપકડ કરાયેલો મોહમ્મદ રઈસ શમસુલ્લા શાહ અંબુજવાડી, માલવણી મલાડ-વેસ્ટમાં રહે છે અને તેની પાસેથી પોલીસે પાંચ ચોરાયેલાં ટૂ-વ્હીલર જપ્ત કર્યાં છે જે બધાં ચારકોપ પોલીસ-સ્ટેશનમાં નોંધાયેલા ચોરીના કેસ સાથે સંકળાયેલાં છે.
કેસની વિગત આપતાં એક પોલીસ-ઑફિસરે કહ્યું હતું કે ‘મોહમ્મદ સામાન્ય પરિવારનો સભ્ય છે અને તે પિતાને લૉન્ડ્રીના વ્યવસાયમાં મદદ કરતો હતો, પણ તેને મોટરસાઇકલનો ભારે શોખ હતો, પણ એ તેને પરવડતું નહોતું.’
ચોરાયેલાં વાહનોનો નિકાલ કરવાને બદલે આરોપી સ્કૂટી-બાઇકને પોતાના ઘર પાસે પાર્ક કરી રાખતો હતો અને એના પર બનાવટી નંબરપ્લેટ લગાવી દેતો હતો. ઑનલાઇન ફૂડ-ઑર્ડરિંગ અને ડિલિવરી-પ્લૅટફૉર્મ સાથે જોડાયેલા કર્મચારીઓને રોજના ૧૦૦-૨૦૦ રૂપિયાના ભાડે આપીને તે રેગ્યુલર કમાણી કરતો હતો.
૩ મેએ નાઇટ-પૅટ્રોલિંગ કરી રહેલા પોલીસ-ઑફિસરોએ ચારકોપના ભાબરેકરનગર નજીક બે છોકરાઓને શંકાસ્પદ રીતે સ્કૂટરને ધક્કો મારતા જોયા. તેમની પૂછપરછ કરતાં તેમણે દાવો કર્યો હતો કે સ્કૂટર તેમના મિત્રનું છે. એક તપાસ-અધિકારીએ જણાવ્યું હતું કે ‘સી-ટ્રેસ વેરિફિકેશન દ્વારા વાહનનો રજિસ્ટ્રેશન-નંબર બનાવટી હોવાનું જાણવા મળ્યું હતું. શૅસિ-નંબર ચેક કરવાથી કન્ફર્મ થયું હતું કે તે અગાઉના કેસ સાથે કનેક્શન ધરાવતું ચોરાયેલું વ્હીકલ હતું.’
પોલીસે બન્ને પાસેથી મોહમ્મદ રઈસનો મોબાઇલ-નંબર મેળવ્યો અને તેને પોલીસ-સ્ટેશન બોલાવ્યો હતો. જ્યારે તે હાજર થવામાં નિષ્ફળ ગયો ત્યારે ઑફિસરોએ તેનું લોકેશન અંબુજવાડીમાં શોધી કાઢ્યું અને ભાગવાનો પ્રયાસ કરતી વખતે તેને ઝડપી લીધો હતો.
