`છાવા’ ફિલ્મે ઔરંગઝેબ સામે લોકોનો ગુસ્સો ભડકાવ્યો: નાગપુર હિંસા પર સીએમ ફડણવીસ

CM Devendra Fadnavis on Nagpur Violence: મંગળવારે વિધાનસભાને સંબોધતા સીએમ ફડણવીસે કહ્યું, "છાવા ફિલ્મે લોકોમાં ઔરંગઝેબ સામે ગુસ્સો ભડકાવ્યો છે, પરંતુ તેમ છતાં દરેક વ્યક્તિએ ખાતરી કરવી જોઈએ કે મહારાષ્ટ્ર શાંતિપૂર્ણ રહે."

વિકી કૌશલ અને સીએમ દેવેન્દ્ર ફડણવીસ (ફાઇલ તસવીર)

નાગપુર શહેરમાં ગઈ કાલથી હિંસા ફાટી નીકળી છે. મુઘલ રાજા ઔરંગઝેબની કબરને હટાવવાની માગણીને લઈને બે જૂથ વચ્ચે અથડામણ થતાં પથ્થરમારો અને આગ બનાવની ઘટના બની હતી. આ પરિસ્થિતી હવે કાબૂમાં છે. આ ઘટનાને લઈને મુખ્ય પ્રધાને વિધાનસભામાં નિવેદન જાહેર કર્યું છે.

મહારાષ્ટ્રના મુખ્ય પ્રધાન દેવેન્દ્ર ફડણવીસે નાગપુરમાં તાજેતરમાં થયેલી હિંસાને `પૂર્વયોજિત કાવતરું` ગણાવ્યું હતું અને તાજેતરમાં રિલીઝ થયેલી વિકી કૌશલની ફિલ્મ `છાવા` જે છત્રપતિ સંભાજી મહારાજના જીવન પર આધારિત હતી તેને ઔરંગઝેબ સામે વધી રહેલી ભાવનાઓ સાથે અશાંતિને જોડી હતી.

‘છાવા’ ફિલ્મથી ઔરંગઝેબ સામે ગુસ્સો વધ્યો

મંગળવારે વિધાનસભાને સંબોધતા સીએમ ફડણવીસે કહ્યું, "છાવા ફિલ્મે લોકોમાં ઔરંગઝેબ સામે ગુસ્સો ભડકાવ્યો છે, પરંતુ તેમ છતાં દરેક વ્યક્તિએ ખાતરી કરવી જોઈએ કે મહારાષ્ટ્ર શાંતિપૂર્ણ રહે." સીએમએ પોલીસ કર્મચારીઓ પર થયેલા હુમલાની સખત નિંદા કરી અને ખાતરી આપી કે ગુનેગારો સામે કડક કાર્યવાહી કરવામાં આવશે.

`સુનિયોજિત હુમલો લાગે છે`: નાગપુર અથડામણો પર ફડણવીસ

વિધાનસભામાં બોલતા, સીએમ ફડણવીસે જણાવ્યું હતું કે વિશ્વ હિન્દુ પરિષદ (VHP) અને બજરંગ દળે નાગપુરમાં વિરોધ પ્રદર્શનનું આયોજન કર્યું હતું, જે ખોટી માહિતીથી વિક્ષેપિત થયા હતા. "અફવાઓ ફેલાવવામાં આવી હતી કે ધાર્મિક વસ્તુઓનું અપમાન કરવામાં આવ્યું છે. આ એક સુનિયોજિત હુમલો લાગે છે."

સીએમ ફડણવીસે ખુલાસો કર્યો કે લગભગ 80 લોકોનું ટોળું પથ્થરમારા કરવામાં સામેલ હતું, જે જાણી જોઈને પોલીસ અધિકારીઓને નિશાન બનાવી રહ્યું હતું. "એક પોલીસ અધિકારી પર કુહાડીથી હુમલો કરવામાં આવ્યો હતો, અને ત્રણ ડેપ્યુટી કમિશનરો પર હુમલો કરવામાં આવ્યો હતો. ચોક્કસ ઘરોને ખાસ નિશાન બનાવવામાં આવ્યા હતા, અને એક ડીસીપી ગંભીર રીતે ઘાયલ થયા હતા," તેમણે ઉમેર્યું.

હિંસાને વેગ આપતી અફવાઓ

ફડણવીસે ભાર મૂક્યો કે કેવી રીતે ખોટી અફવાઓએ તણાવ વધારવામાં મુખ્ય ભૂમિકા ભજવી હતી. "અફવાઓ ફેલાવવામાં આવી હતી કે ઔરંગઝેબની કબરના ચાદર પરના ધાર્મિક પ્રતીકનું અપમાન કરવામાં આવ્યું છે. કોઈને પણ કાયદો પોતાના હાથમાં લેવાનો અધિકાર નથી," તેમણે જણાવ્યું. પરિસ્થિતિને નિયંત્રિત કરવા માટે, અધિકારીઓએ પાંચ ફોજદારી કેસ નોંધ્યા છે અને 11 પોલીસ સ્ટેશન વિસ્તારોમાં પ્રતિબંધક આદેશો લાગુ કર્યા છે. વધુમાં, રાજ્ય અનામત પોલીસ દળ (SRPF) ના પાંચ એકમો તૈનાત કરવામાં આવ્યા છે, એવી માહિતી સીએમ ફડણવીસે આપી હતી.

પોલીસના જણાવ્યા મુજબ ગઈ કાલે બપોર પછી નાગપુરના શિવાજી ચોકમાં ઔરંગઝેબની કબર હટાવવા માટે સૂત્રોચ્ચાર કરવામાં આવ્યા બાદ મુસ્લિમ સંપ્રદાયના લોકોએ પણ સૂત્રોચ્ચાર કરતાં વિવાદ વધુ તીવ્ર બન્યો હતો. ચિટણીસ પાર્કમાંથી લોકોએ પોલીસ પર પથ્થરમારો કરવાની શરૂઆત કરી હતી. પોલીસે લોકોને વિખેરવા માટે અશ્રુ ગૅસના ગોળા ફેંક્યા. આમ છતાં પથ્થરમારો ચાલુ રહેતાં પોલીસે લાઠીચાર્જ કરીને લોકોની ભીડને વિખેરી હતી.