પત્નીની હત્યા કરીને પતિએ ટ્રેન સામે પડતું મૂક્યું

પોલીસે તેના તૂટેલા મોબાઇલ ફોનની મદદથી મરનાર મહિલાના પતિ પોપટ દહીજની ઓળખ કરી હતી

પ્રતીકાત્મક તસવીર

ડોમ્બિવલીમાં પત્નીની હત્યા કર્યા બાદ પતિએ ટ્રેન સામે પડતું મૂકીને આત્મહત્યા કરી લીધી હોવાનો બનાવ સામે આવ્યો છે. મંગળવારે ડોમ્બિવલીમાં રહેતી જ્યોતિ દહીજ નામની મહિલાનો મૃતદેહ મળી આવ્યો હતો.  ત્યાર બાદ મહિલાનો પતિ ફરાર હતો તેથી પોલીસે શંકાના આધારે પતિની શોધખોળ શરૂ કરી હતી. પ્રાથમિક તપાસ મુજબ મહિલાનું ગળું દબાવીને તીક્ષ્ણ હથિયારથી હુમલો કરીને તેણે મારવામાં આવી હોવાનું પોલીસને જણાયું હતું. ત્યાર બાદ પોલીસે મહિલાના પતિનો મોબાઇલ સર્વેલન્સમાં રાખ્યો હતો. શુક્રવારે ભાંડુપ સ્ટેશન પરથી એક અજાણી વ્યક્તિએ લોકલ ટ્રેનની સામે કૂદીને આત્મહત્યા કરી હોવાનો કેસ નોંધાયો હતો. પોલીસે તેના તૂટેલા મોબાઇલ ફોનની મદદથી મરનાર મહિલાના પતિ પોપટ દહીજની ઓળખ કરી હતી. ઘરેલુ બાબતે પતિએ આ પગલું ભર્યું હોવાની પોલીસે શંકા વ્યક્ત કરી છે.