28 April, 2026 07:26 PM IST | Mumbai | Gujarati Mid-day Online Correspondent
અનિલ અંબાણી - ફાઇલ તસવીર
એન્ફોર્સમેન્ટ ડિરેક્ટોરેટ (ED) દ્વારા અનિલ અંબાણીની આગેવાની હેઠળના રિલાયન્સ ગ્રુપ પર મોટી કાર્યવાહી કરવામાં આવી છે. બેંક છેતરપિંડીના કેસમાં રિલાયન્સ કોમ્યુનિકેશન્સ લિમિટેડ (RCOM) અને રલાયન્સ ઇન્ફ્રાસ્ટ્રક્ચર સાથે સંકળાયેલી ₹3,034.90 કરોડની અસ્કયામતો જપ્ત કરવામાં આવી છે. આ તાજી કાર્યવાહી સાથે રિલાયન્સ અનિલ અંબાણી ગ્રુપ (RAAG) સામે અત્યાર સુધીમાં જપ્ત કરાયેલી કુલ સંપત્તિનો આંકડો ₹19,344 કરોડને પાર કરી ગયો છે.
ED દ્વારા પ્રિવેન્શન ઓફ મની લોન્ડરિંગ એક્ટ (PMLA), 2002 હેઠળ જે સંપત્તિઓ ટાંચમાં લેવામાં આવી છે તેમાં નીચેની મિલકતોનો સમાવેશ થાય છે:
આ સમગ્ર મામલો રિલાયન્સ કોમ્યુનિકેશન્સ લિમિટેડ દ્વારા કરવામાં આવેલ અંદાજે ₹40,185 કરોડના બેંક લોન કૌભાંડ સાથે જોડાયેલો છે. સ્ટેટ બેંક ઓફ ઈન્ડિયા (SBI), પંજાબ નેશનલ બેંક (PNB), બેંક ઓફ બરોડા (BoB) અને LIC જેવી મોટી સંસ્થાઓની ફરિયાદના આધારે CBI એ નોંધેલી એફઆઈઆર (FIR) મુજબ ED એ આ તપાસ હાથ ધરી છે. સુપ્રીમ કોર્ટના નિર્દેશ પર રચાયેલી સ્પેશિયલ ઇન્વેસ્ટિગેશન ટીમ (SIT) જાહેર નાણાંની ગેરરીતિ અને લોન્ડરિંગના આરોપોની તપાસ કરી રહી છે.
ED ની તપાસમાં બહાર આવ્યું છે કે અનિલ અંબાણીએ પોતાની અંગત સંપત્તિઓને બેંકોની લોન જવાબદારીઓથી બચાવવા માટે `RiseE Trust` નામનું એક ફેમિલી ટ્રસ્ટ બનાવ્યું હતું. RCOM માટે લેવામાં આવેલી લોનમાં અનિલ અંબાણીએ પોતાની પર્સનલ ગેરંટી આપી હતી. જ્યારે આ લોન NPA (નૉન-પરફોર્મિંગ એસેટ) બની ગઈ, ત્યારે મિલકતોને બેંકો દ્વારા જપ્ત થતી અટકાવવા માટે તેને આ ટ્રસ્ટ હેઠળ ટ્રાન્સફર કરી દેવામાં આવી હતી. તપાસ એજન્સીનો આરોપ છે કે આ પ્રકારનું માળખું જાણીજોઈને બેંકોને મિલકતો સુધી પહોંચતા રોકવા માટે ઊભું કરવામાં આવ્યું હતું.
PMLA ની કલમ 8 હેઠળ, જપ્ત કરવામાં આવેલી આ મિલકતો અંતે કાયદેસરના દાવેદારો એટલે કે ભોગ બનેલી બેંકોને સોંપવામાં આવી શકે છે. અધિકારીઓના જણાવ્યા મુજબ, જાહેર નાણાંની વસૂલાત અને રોકાણકારોના હિતોનું રક્ષણ કરવા માટે આ એક નિર્ણાયક પગલું છે. હાલમાં તપાસ ચાલુ છે અને એજન્સીઓ વધુ સંપત્તિઓ અને શંકાસ્પદ નાણાકીય વ્યવહારોની તપાસ કરી રહી છે.
