રાજ્યની ૨૦ નગરપાલિકાના કેટલાક પ્રભાગોની ચૂંટણી આગળ ધકેલાઈ

કોર્ટમાં પેન્ડિંગ અપીલો અને ટેક્નિકલ ખામી જેવાં કારણોને લીધે અનેક સ્થાને ૨૦ અને ૨૯ ડિસેમ્બરે મતદાન થશે

પ્રતીકાત્મક તસવીર

રાજ્યમાં ૨૪૬ નગર પરિષદો અને ૪૨ નગર પંચાયતોની ચૂંટણી આવતી કાલે બીજી ડિસેમ્બરે થવાની છે અને ત્રીજી ડિસેમ્બરે એનાં પરિણામો જાહેર થવાનાં છે. જોકે ૨૦ જિલ્લાઓમાં કેટલીક નગર પરિષદોના અમુક પ્રભાગોની ચૂંટણીઓ કોર્ટમાં અપીલ થવાને કારણે આગળ ધકેલાઈ છે. એમાં પુણે, સોલાપુર, ચંદ્રપુર, યવતમાળ, અહલ્યાનગર, ધારાશિવ, નાંદેડ વગેરે જિલ્લાઓનો સમાવેશ થાય છે. કેટલીક જગ્યાએ ટેક્નિકલ કારણોને લીધે ચૂંટણી પાછી ઠેલાઈ છે.  

પુણે જિલ્લાના માવળ તાલુકાની ૧૨ જગ્યાની ચૂંટણી રોકી દેવામાં આવી છે, જેમાં તળેગાવની ૬ અને લોનાવલાની ૬ બેઠકોનો સમાવેશ થાય છે. ત્યાં હવે ૨૯ ડિસેમ્બરે ચૂંટણી યોજવામાં આવશે. એ જ રીતે સોલાપુર જિલ્લામાં મંગળવેઢા નગર પરિષદ અને નગરસેવકપદ માટે ૨૦ ડિસેમ્બરે ચૂંટણી યોજાશે. અહિલ્યાનગર જિલ્લામાં કોપરગાવ, દેવલાલી, નવેસા અને પાથર્ડીની ચૂંટણીઓ આગળ ધકેલાઈ છે. બારામતીમાં નગરાધ્યક્ષની ચૂંટણી સહિત ૭ જગ્યાએ અને અમરાવતીના અંજનગાવ સુરજી નગર પરિષદની ચૂંટણી ૨૦ ડિસેમ્બરે યોજાશે.