11 June, 2026 03:38 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
એક જૉબ પોર્ટલ પર નોકરી માટેની જાહેરાતને લઈને એક નવો વિવાદ ઉભો થયો છે. અમદાવાદ સ્થિત એક કૅમિકલ કંપની દ્વારા જાહેર કરાયેલ જનરલ મૅનેજરના પદ માટેની જાહેરાતમાં કહેવામાં આવ્યું હતું કે ફક્ત ગુજરાતી અને મારવાડી ઉમેદવારોને જ પ્રાધાન્ય આપવામાં આવશે. આ અંગે હવે વિવાદ શરૂ થયો છે અને શિવસેનાના નેતા અને ભૂતપૂર્વ સાંસદ ગજાનન કીર્તિકરે આનો સખત વિરોધ કર્યો છે અને કંપનીને ચેતવણી આપી છે કે જો મરાઠી ઉમેદવારોને અવગણવામાં આવશે તો તેઓ વિરોધ કરશે.
અહેવાલ મુજબ, નૌકરી ડૉટ કૉમ પર એક જાહેરાત પ્રકાશિત કરવામાં આવી હતી, જેમાં અમદાવાદ સ્થિત એક કૅમિકલ કંપનીમાં જનરલ મૅનેજરના પદ માટે ભરતી માટે જાહેરાત કરવામાં આવી હતી. આ પદ માટેનું પૅકેજ આશરે રૂ. 22 લાખ હોવાનું જણાવવામાં આવ્યું હતું. જ્યારે જાહેરાતમાં કથિત રીતે કહેવામાં આવ્યું હતું કે ફક્ત ગુજરાતી અને મારવાડી ઉમેદવારોને જ આ પદ માટે પ્રાધાન્ય આપવામાં આવશે ત્યારે વિવાદ ફાટી નીકળ્યો. આ શરતે રાજકીય વિવાદ ઊભો કર્યો છે.
શિવસેનાના નેતા ગજાનન કીર્તિકરે જાહેરાત પર નારાજગી વ્યક્ત કરતા કહ્યું કે મુંબઈમાં કાર્યરત કંપનીઓએ સ્થાનિક મરાઠી યુવાનોને પણ તકો પૂરી પાડવી જોઈએ. તેમણે કહ્યું, તેમણે કહ્યું, "વાહ રે વાહ! તેઓ મુંબઈમાં ધંધો કરવા આવે છે, છતાં અહીં રોજગાર શોધતા મરાઠી લોકોને નોકરી આપવાનો ઇનકાર કરે છે. મને ખબર નથી કે કંપની ક્યાં તેની શાખા ખોલવાની યોજના ધરાવે છે, પરંતુ જો કોઈ પણ સંજોગોમાં મરાઠી ઉમેદવારોની પસંદગી નહીં થાય, તો અમે કંપનીને ઘેરી લઈશું અને ત્યાંનું કામ બંધ કારવશું. અમે આ સહન કરીશું નહીં, અને અમે તેને છોડશું નહીં."
ગજાનન કીર્તિકરે આ બાબતને મરાઠી યુવાનો સાથે અન્યાય ગણાવી છે. તેમનું કહેવું છે કે મુંબઈ અને મહારાષ્ટ્રમાં કામ કરતી કંપનીઓએ સ્થાનિક ઉમેદવારોને તક આપવી જોઈએ. અગાઉ પણ શિવસેના સ્થાનિક યુવાનોને રોજગારમાં પ્રાથમિકતા આપવાની માગ ઉઠાવી રહી હતી. જાહેરાત સામે આવ્યા પછી, આ મુદ્દાએ રાજકીય સ્વરૂપ ધારણ કર્યું છે. હવે, આ વિવાદ અને ભરતી પ્રક્રિયા પર તેના વલણ અંગે કંપની શું સ્પષ્ટતા આપે છે તે જોવાનું બાકી છે. ગજાનન કીર્તિકરની ચેતવણી બાદ, કંપની તેની ભરતી નીતિમાં કોઈ ફેરફાર કરે છે કે નહીં તે જોવાનું બાકી છે. હાલમાં, જૉબ પોર્ટલ પર પ્રકાશિત આ જાહેરાત રાજકીય અને સામાજિક રીતે ચર્ચામાં છે.
