આઇફોન ચોરીને જુદાં-જુદાં રાજ્યોમાં વેચતી ટોળકી પકડાઈ, જપ્ત કરવામાં આવી ૪૪,૭૮,૪૦૦ રૂપિયાની મતા

વિવિધ રાજ્યોમાં હાથસફાઈ કરીને, આઇફોન ચોરીને એને વેચતી ટોળકીને પોલીસે ઝબ્બે કરી છે.

પોલીસે જણાવ્યું હતું કે મળી આવેલ મતાનું કુલ મૂલ્ય અંદાજે રૂ. ૪૪.૭૮ લાખ આંકવામાં આવ્યું છે. તસવીર/મુંબઈ પોલીસ

વિવિધ રાજ્યોમાં હાથસફાઈ કરીને, આઇફોન ચોરીને એને વેચતી ટોળકીને પોલીસે ઝબ્બે કરી છે. ૪ જણની આ ટોળકી પાસેથી કુલ ૪૪,૭૮,૪૦૦ રૂપિયાની મતા જપ્ત કરી હોવાનું પોલીસે સોમવારે જણાવ્યું હતું.

પોલીસે જણાવ્યા અનુસાર આ ગૅન્ગ ટેક્નિકલ એક્સપર્ટ્‍સની મદદથી આઇફોનનું ઍપલ આઇડેન્ટિફિકેશન (ID) કાઢીને એને અન્ય રાજ્યોમાં વેચી દેતી હતી. જો એ ચોરાયેલા ફોનનું ઍપલ ID કાઢીને ડિવાઇસનું લૉક ન ખોલી શકે તો એના મધરબોર્ડ, ડિસ્પ્લે જેવા ઓરિજિનલ સ્પેરપાર્ટ્‍સને અન્ય સાથીદારોને ઊંચા ભાવે વેચતા હતા. 

આ ઑપરેશન દરમ્યાન ચોરો પાસેથી ચોરાયેલા ૬૪ ફોન, ૧૨ સિમ કાર્ડ, ડિસ્પ્લે, બૅટરી, મધરબોર્ડ અને લૉજિક બોર્ડ જેવા સ્પેરપાર્ટ્‍સ મળીને આશરે ૪૪,૭૮,૪૦૦ રૂપિયાનો મુદ્દામાલ જપ્ત કરવામાં આવ્યો હતો. તેમની ધરપકડને કારણે મહારાષ્ટ્ર, તેલંગણ, દિલ્હી, કર્ણાટક, રાજસ્થાન, તામિલનાડુ અને ઉત્તરાખંડના અનેક કેસ ઉકેલવામાં મદદ મળી હતી. તેમની સાથે બીજું કોણ સંકળાયેલું છે અને ચોરાયેલા ફોન ખરીદનારા બીજા કોણ-કોણ છે એ જાણવા પૂછપરછ ચાલી રહી હોવાનું પોલીસે જણાવ્યું હતું.