30 November, 2025 07:43 AM IST | Mumbai | Gujarati Mid-day Correspondent
પ્રતીકાત્મક તસવીર
ઘાટકોપર-ઈસ્ટના જીરાવલ્લા દેરાસરમાં ગુરુવારે વહેલી સવારે પૂજા કરવા જઈ રહેલાં ૭૨ વર્ષનાં વીણા સાવલાને ઍડ્રેસ પૂછવાના બહાને ઊભાં રાખી બે ગઠિયાઓ તેમની ચેઇન ખેંચીને નાસી ગયા હતા. આ મામલે પંતનગર પોલીસે ફરિયાદ નોંધીને ચેઇન-સ્નૅચરોની ક્લોઝ્ડ-સર્કિટ ટેલિવિઝન (CCTV) કૅમેરાનાં ફુટેજના આધારે વધુ તપાસ શરૂ કરી છે. પારસધામ નજીકના એક બિલ્ડિંગમાં રહેતાં વીણાબહેન સવારે છ વાગ્યાની આસપાસ ઘરેથી નીકળીને દેરાસર જઈ રહ્યાં હતાં ત્યારે ભાટિયાવાડી નજીક કુર્લા જાને કે લિએ કહાં સે જાના પડેગા એમ પૂછી રસ્તા પર રોકીને તફડંચી કરવામાં આવી હતી. વીણાબહેનની દોઢ તોલાની જે ચેઇન ચોરાઈ હતી એ તેમના સદ્ગત પતિએ તેમને ૧૨ વર્ષ પહેલાં ભેટ આપી હતી.
વીણાબહેનના પુત્ર દિવેશ સાવલાએ ‘મિડ-ડે’ને કહ્યું હતું કે ‘મમ્મી રોજ સવારે વહેલી ઘરેથી ચાલતી જીરાવલ્લા દેરાસરમાં પૂજા કરવા જતી હોય છે. એ દિવસે પણ મમ્મી દેરાસર જઈ રહી હતી ત્યારે ભાટિયાવાડી નજીક બે લોકોએ તેને ઍડ્રેસ પૂછવાના બહાને અટકાવી મમ્મીએ ગળામાં પહેરેલી ચેઇન ખેંચીને બાઇક પર નાસી ગયા હતા. આ ઘટના બાદ મમ્મી થોડી ડરી ગઈ હતી. આ મામલે અમે પોલીસમાં ફરિયાદ નોંધાવી છે.’
પંતનગર પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘આ મામલે રૉબરીની ફરિયાદ નોંધીને વધુ તપાસ શરૂ કરવામાં આવી છે. આરોપીની ઓળખ કરવા નજીકના વિસ્તારમાં લાગેલા CCTV કૅમેરાનાં ફુટેજ તપાસવામાં આવી રહ્યાં છે.’