10 November, 2026 08:31 AM IST | Mumbai | Gujarati Mid-day Correspondent
પ્રતીકાત્મક તસવીર
વિલે પાર્લે-વેસ્ટના બજાજ રોડ પર આવેલી એક સોસાયટીમાં રહેતાં ૬૫ વર્ષનાં ગુજરાતી ગૃહિણીના ઘરમાંથી ૯,૮૦,૦૦૦ રૂપિયાની કિંમતના સોનાના દાગીના ચોરી થયા હોવાની ફરિયાદ ગઈ કાલે જુહુ પોલીસ-સ્ટેશનમાં નોંધાઈ છે. ગુજરાતી ગૃહિણી દ્વારા નોંધાવેલી ફરિયાદ મુજબ આ ચોરી ૬ નવેમ્બરની રાત્રે ૧૧.૩૦ વાગ્યાથી ૭ નવેમ્બરની સાંજે ૭.૩૦ વાગ્યાના સમયગાળા દરમ્યાન થઈ હતી અને આ કેસમાં પોલીસે ઘરમાં કામ કરતી ચાર હાઉસહેલ્પ મહિલાઓની સંડોવણી હોવાની શંકા વ્યક્ત કરી એના આધારે તપાસ હાથ ધરી છે.
જુહુ પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘ગુજરાતી ગૃહિણી પોતાના પરિવાર સાથે દીકરી તથા બોરીવલી ખાતે સગાં-સંબંધીઓને મળવા ગયાં હતાં અને પરત આવ્યા બાદ કબાટનું ડ્રૉઅર તપાસતાં સોનાના દાગીના ગાયબ હોવાનું માલૂમ પડ્યું હતું, જેમાં ૨૦ ગ્રામ વજનના સોનાના પાટલા, ચાર સોનાની બંગડી અને છ સોનાની અંગૂઠીઓ સહિત કુલ ૯,૮૦,૦૦૦ રૂપિયાની મિલકત ચોરાઈ હોવાનું આંકવામાં આવ્યું છે. ઘટનાની જાણ થતાં પરિવારે ઘરમાં તપાસ કરી પત્તો ન લાગતાં આખરે પોલીસમાં ફરિયાદ નોંધાવી છે અને ઘરમાં નિયમિત કામ કરતી ચાર હાઉસહેલ્પ મહિલાઓ પૈકી કોઈની સંડોવણી છે કે કેમ એ દિશામાં તથા આસપાસનાં CCTV ફુટેજ અને અન્ય પુરાવાઓના આધારે પોલીસે ગુનો નોંધી ચોરને પકડી પાડવા તપાસનાં ચક્રો ગતિમાન કર્યાં છે.’
