ગુઢીપાડવાના અવસરે મુંબઈગરાઓએ ૩૨ કરોડ રૂપિયાની કેરી ખાધી

એક દિવસમાં કોકણની આફૂસ સાથે બહારનાં રાજ્યોમાંથી આવેલી કુલ ૯૦,૦૦૦ ડઝન કેરીની ખરીદી થઈ

પ્રતીકાત્મક તસવીર (તસવીર સૌજન્યઃ એઆઇ)

નવી મુંબઈની ઍગ્રિકલ્ચરલ પ્રોડ્યુસ માર્કેટ કમિટી (APMC)માંથી ગયા અઠવાડિયામાં મુંબઈ, થાણે અને નવી મુંબઈની લોકલ માર્કેટોમાં કુલ ૩૨ કરોડ રૂપિયાની કેરી વેચાઈ છે. ગુઢીપાડવા નિમિત્તે મુંબઈગરાઓએ ૯૦,૦૦૦ ડઝન કેરી ખાધી હતી.

APMCમાં ગુરુવારે આફૂસની ૧૩,૯૨૫ પેટી આવી હતી. છેલ્લા ૧૦ દિવસમાં APMCમાંથી ૯૦,૦૦૦ ડઝન કાચી આફૂસ વેચાઈ છે એમ જણાવતાં APMCના ફ્રૂટમાર્કેટના ડિરેક્ટર સંજય પાનસરેએ કહ્યું હતું કે ‘ગુરુવારે રાત્રે બજારમાં પાકેલી આફૂસ ૨૫૦૦ રૂપિયા પ્રતિ ડઝનના ભાવે વેચાઈ હતી અને કુલ ૨૨.૫૦ કરોડ રૂપિયાનું ટર્નઓવર થયું હતું. બીજાં રાજ્યોની કેરીનું પણ લગભગ ૧૦ કરોડ રૂપિયાનું વેચાણ થયું હતું. આમ કુલ ૩૨.૫૦ કરોડ રૂપિયાની કેરી વેચાઈ હતી.’

જોકે ગયા વર્ષની સરખામણીમાં આ વર્ષે ૪૦,૦૦૦ પેટી ઓછી વેચાઈ છે. ગુઢીપાડવાએ APMCની ફ્રૂટમાર્કેટમાં કોકણ આફૂસની ૧૩,૯૨૫ પેટી આવી હતી, જ્યારે બીજાં રાજ્યોમાંથી ૧૦,૮૭૫ પેટી એમ કુલ મળી ૨૪,૮૦૦ પેટી આવી હતી એમ જણાવતાં સંજય પાનસરેએ કહ્યું હતું કે ‘આફૂસની પાંચથી ૯ ડઝનની પેટી ૨૦૦૦થી ૮૦૦૦ રૂપિયામાં વેચાય છે. છેલ્લા ૧૫ દિવસમાં કોકણ આફૂસની ફક્ત ૨૬,૨૭૩ પેટી વેચાઈ હતી, જ્યારે બીજાં રાજ્યોમાંથી ૧,૦૭,૭૧૨ પેટી કેરી આવી હતી.’