27 August, 2026 10:28 AM IST | Mumbai | Gujarati Mid-day Correspondent
ગોલ્ડન રૉક બાર ઍન્ડ રેસ્ટોરાંની બહાર સોમવાર રાત્રે બનેલી ઘટના.
વસઈમાં દારૂના નશામાં ધુત એક મહિલાનો ભારે હાઈ-વૉલ્ટેજ ડ્રામા સામે આવ્યો છે. વસઈ-વેસ્ટમાં આવેલી ગોલ્ડન રૉક બાર ઍન્ડ રેસ્ટોરાંની બહાર સોમવાર રાત્રે એક મહિલાએ રસ્તા પર નશાની હાલતમાં ધમાલ મચાવી હતી અને બારના કર્મચારીઓ સાથે ઝપાઝપી કરી હતી. પોલીસે આપેલી માહિતી મુજબ આ મહિલા તેનાં બે બાળકો સાથે બારમાં ગઈ હતી. બારમાંથી બહાર નીકળ્યા પછી પણ તે અતિશય દારૂ પીધેલી હાલતમાં હતી. કર્મચારીઓએ તેને બહાર જવાનું કહેતાં તેણે ફરી બારની અંદર ઘૂસવાનો પ્રયાસ કર્યો હતો. આ દરમ્યાન મહિલાએ એક કર્મચારીનું ટી-શર્ટ મજબૂતીથી પકડી લીધું હતું અને ઝપાઝપીમાં તે રસ્તા પર પડી ગઈ હતી. આ સમયે તેનાં બાળકો પણ ત્યાં હાજર હતા. તેનો દીકરો ‘મમ્મી છોડી દે’ એવી રીતે કરગરીને વિનંતી કરતો હતો, પણ મહિલા મોટેથી બૂમો પાડી રહી હતી.
સ્થાનિક લોકોએ તરત 112 નંબર પર ફોન કરીને જાણ કરતાં માણિકપુર પોલીસ-સ્ટેશનનો કાફલો અને મહિલા પોલીસો સ્થળ પર પહોંચ્યાં હતાં. જોકે નશામાં ધુત મહિલાએ પોલીસ સાથે પણ ધક્કામુક્કી કરીને ત્યાંથી જતા રહેવા જણાવ્યું હતું. આ સમગ્ર મામલે માણિકપુર પોલીસે નૉન-કૉગ્નિઝેબલ (NC) નોંધ કરી છે.
