21 September, 2026 04:15 PM IST | Mumbai | Gujarati Mid-day Online Correspondent
ફાઇલ તસવીર
આઇઆઇટી બોમ્બે (IIT Bombaby)માં BTechના બીજા વર્ષના વિદ્યાર્થી સાહિલ વાકોડે (Sahil Wakode)ના કરૂણ આપઘાત અંગે ચાલી રહેલી તપાસ વચ્ચે IIT બોમ્બેએ પ્રોફેસર સૂર્યનારાયણ દુલ્લા (Professor Suryanarayana Doolla)ને તેમના ડીન પદ પરથી સસ્પેન્ડ કરી દીધા છે. આ સાથે જ સંસ્થાએ આ ઘટનાની પરિસ્થિતિઓ અંગે પોતાના પ્રારંભિક નિવેદનો બદલ માફી માંગી છે અને સ્વીકાર્યું છે કે, સત્તાવાર તપાસના તારણો આવે ત્યાં સુધી સંસ્થાએ પ્રતિક્રિયા આપવા માટે રાહ જોવી જોઈતી હતી.
એક મોટી વહીવટી કાર્યવાહીમાં, ઇન્ડિયન ઇન્સ્ટિટ્યૂટ ઓફ ટેક્નોલોજી (IIT) બોમ્બેએ BTechના બીજા વર્ષના વિદ્યાર્થી સાહિલ વાકોડેના કરૂણ આપઘાત બાદ સર્જાયેલા ભારે વિરોધ અને હોબાળા વચ્ચે સોમવારે પ્રોફેસર સૂર્યનારાયણ દુલ્લાને તેમના ડીન પદ પરથી તત્કાલ અસરથી સસ્પેન્ડ (IIT Bombay Professor suspended) કરી દીધા છે. IIT બોમ્બેના ડાયરેક્ટર શિરીષ કેદારેએ વિદ્યાર્થીઓને મોકલેલા ઇમેઇલમાં આ સસ્પેન્શનની પુષ્ટિ કરી છે અને જણાવ્યું છે કે આગળની વહીવટી કાર્યવાહી ચાલી રહેલી તપાસના નિષ્કર્ષ પર આધારિત રહેશે.
આ વિવાદ શુક્રવારે, ૧૮ સપ્ટેમ્બરે ત્યારે શરૂ થયો જ્યારે પવઈ કેમ્પસની હોસ્ટેલના રૂમમાંથી ડિપાર્ટમેન્ટ ઓફ એનર્જી સાયન્સ એન્ડ એન્જિનિયરિંગના ૨૦ વર્ષીય વિદ્યાર્થી સાહિલ વાકોડેનો મૃતદેહ મળી આવ્યો હતો. તે બપોરે મિડ-સેમેસ્ટર પરીક્ષા દરમિયાન નિરીક્ષક (ઇન્વિજિલેટર) તરીકે ડ્યુટી પર રહેલા પ્રોફેસર દુલ્લાએ સાહિલને પરીક્ષા ખંડમાં મોબાઇલ ફોન સાથે પકડ્યો હતો. સંસ્થાના પ્રારંભિક દાવ અનુસાર, વિદ્યાર્થીએ પ્રશ્નપત્રને સ્માર્ટફોન દ્વારા ChatGPT પર અપલોડ કરીને જવાબો મેળવવાનો પ્રયાસ કર્યો હતો.
જોકે, સંસ્થાએ શરૂઆતમાં એવો દાવો કર્યો હતો કે વિદ્યાર્થીને માત્ર કાઉન્સેલિંગ આપવામાં આવ્યું હતું અને તેની શૈક્ષણિક કારકિર્દી પર કોઈ અસર નહીં પડે તેવી ખાતરી આપવામાં આવી હતી, પરંતુ વિરોધ કરી રહેલા વિદ્યાર્થીઓ અને મૃતકના પરિવારે આ દાવાને સખત રીતે નકારી કાઢ્યો હતો.
વિદ્યાર્થીના અવસાન બાદ, તેના પરિવારે કેમ્પસમાં સંસ્થાકીય ઉત્પીડન અને જ્ઞાતિ આધારિત ભેદભાવનો આક્ષેપ કર્યો હતો. સાહિલના પિતાની ફરિયાદના આધારે મુંબઈ પોલીસે પ્રોફેસર દુલ્લા સામે આપઘાતની દુષ્પ્રેરણા (અબેટમેન્ટ ટુ સુસાઇડ) અને અનુસૂચિત જાતિ અને અનુસૂચિત જનજાતિ (અત્યાચાર નિવારણ) અધિનિયમ (SC/ST એક્ટ) ની કલમો હેઠળ એફઆઈઆર (FIR) નોંધી છે.
આ આરોપોની ઊંડાણપૂર્વક તપાસ સુનિશ્ચિત કરવા માટે પોલીસ સત્તાવાળાઓએ આ કેસની તપાસ `મુંબઈ પોલીસ ક્રાઇમ બ્રાન્ચ`ને સોંપી દીધી છે.
વધતા દબાણ વચ્ચે, ડાયરેક્ટર શિરીષ કેદારેએ આંદોલનકારી વિદ્યાર્થીઓની ૧૮ મુદ્દાની માંગણીઓનો સ્વીકાર કર્યો છે. સંસ્થાના વહીવટી તંત્રે ઘટના તરફ દોરી ગયેલી પરિસ્થિતિઓ અંગેના પોતાના અગાઉના જાહેર નિવેદનો પાછા ખેંચીને સત્તાવાર માફી માંગી છે અને સ્વીકાર્યું છે કે સત્તાવાર તપાસના નિષ્કર્ષ આવે તે પહેલાં વિગતો જાહેર કરવી અયોગ્ય હતી.
બીજી તરફ, `IIT બોમ્બે ફેકલ્ટી ફોરમે` પ્રોફેસર દુલ્લા પ્રત્યે સમર્થન વ્યક્ત કર્યું છે અને ભારપૂર્વક જણાવ્યું છે કે તેઓ સેનેટ-મંજૂર શૈક્ષણિક નીતિઓ મુજબ બિનઅધિકૃત સ્માર્ટફોનના ઉપયોગની જાણ કરીને માત્ર પોતાની સંસ્થાકીય ફરજ બજાવી રહ્યા હતા. ક્રાઇમ બ્રાન્ચની તપાસ ચાલુ હોવાની સાથે, કેમ્પસ સત્તાવાળાઓએ માનસિક સ્વાસ્થ્ય કાઉન્સેલિંગ, ફેકલ્ટી કોડ ઓફ કંડક્ટ અને વિદ્યાર્થી કલ્યાણ પ્રોટોકોલમાં વ્યાપક સુધારા કરવાનું વચન આપ્યું છે.
