કમલ સદાનાની ફરિયાદ નોંધવાનો પોલીસને છેક ૬ મહિને સમય મળ્યો

OLX પરથી સ્નૂકર-ટેબલ ખરીદવાના ચક્કરમાં ૭૦,૦૦૦ રૂપિયા ગુમાવ્યા હતા આ ઍક્ટરે

સાઇબર ગઠિયાએ કમલને વૉટ્સઍપ પર મોકલેલા સ્નૂકર-ટેબલના ફોટો.

બાંદરામાં રહેતા ૫૪ વર્ષના ઍક્ટર કમલ સદાના ઑગસ્ટના અંતમાં પોતાનાં બાળકો માટે OLX  પર સ્નૂકર-ટેબલ ખરીદવા ગયા એમાં તેમની સાથે ૭૦,૦૦૦ રૂપિયાની છેતરપિંડી થઈ હોવાની ફરિયાદ ગઈ કાલે બાંદરા પોલીસ-સ્ટેશનમાં નોંધાઈ હતી. સલમાન ખાનના ઘરે હુમલો, બાબા સિદ્દીકી હત્યા-કેસ જેવા સતત મોટા કેસોમાં વ્યસ્ત રહેતી બાંદરા પોલીસે આશરે છ મહિના બાદ કમલની ફરિયાદ નોંધી ઑફિશ્યલી તપાસ હાથ ધરી હતી. જોકે સાઇબર-છેતરપિંડીમાં ગોલ્ડન અવર ખૂબ જ મહત્ત્વનો માનવામાં આવતો હોય છે એટલે કમલના કેસમાં રિકવરી થાય એની શક્યતા ખૂબ જ ઓછી છે છતાં પોલીસે જરૂરી તપાસ હાથ ધરી છે.

મારી ફરિયાદ નોંધવામાં પોલીસે છ મહિના સુધી સતત ગલ્લાંતલ્લાં કર્યાં, પણ હવે મારો પોલીસ પર પૂરેપૂરો વિશ્વાસ છે કે એ મારી ફરિયાદ પર યોગ્ય તપાસ કરી કાર્યવાહી કરશે એમ જણાવતાં કમલ સદાનાએ ‘મિડ-ડે’ને કહ્યું હતું કે ‘હું ઑગસ્ટમાં મારાં બાળકો માટે સ્નૂકર-ટેબલ ખરીદવા માગતો હતો જેના માટે ઑનલાઇન સર્ચ કરતાં મને OLX પ્લૅટફૉર્મ પર ધીરેન માર્ગી નામનો યુવક સ્નૂકર-ટેબલ વેચતો હોવાનું દેખાઈ આવતાં મેં તેને મેસેજ કરી મારો નંબર મોકલ્યો હતો. થોડી વારમાં તેણે મને વૉટ્સઍપ પર સ્નૂકર-ટેબલના ફોટો મોકલ્યા હતા. એમાંથી એક ટેબલ મને પસંદ આવતાં એ ટેબલના ૭૦,૦૦૦ રૂપિયા મેં તેના બૅન્ક-અકાઉન્ટમાં ટ્રાન્સફર કરી દીધા હતા. જોકે એ બાદ આશરે એક મહિના સુધી તેણે મને ટેબલ મોકલ્યું નહોતું. એટલું જ નહીં, દરેક સમયે મને અલગ-અલગ બહાનાં આપતો હોવાથી મારી પાસે પૈસા લઈ તેણે છેતરપિંડી કરી હોવાની મને ખાતરી થયા બાદ હું તેની ફરિયાદ કરવા બાંદરા પોલીસ-સ્ટેશનમાં ગયો હતો. જોકે એ સમયે પોલીસ-સ્ટાફ બીજા કેસોમાં વ્યસ્ત હોવાથી મારી ફરિયાદ નોંધાઈ નહોતી. ત્યાર બાદ સમયાંતરે હું પોલીસ-સ્ટેશન પર મારી ફરિયાદ નોંધાવવા માટે ગયો હતો. જોકે દરેક સમયે પોલીસ મોટા કેસોમાં વ્યસ્ત હોવાથી મારી ફરિયાદ નોંધાઈ નહોતી. અંતે પોલીસે ગઈ કાલે મારી ફરિયાદ નોંધીને તપાસ હાથ ધરી છે. દેર આએ, દુરુસ્ત આએ; પોલીસ મારી સાથે થયેલી છેતરપિંડીમાં મને ન્યાય અપાવશે.’

પ્રાથમિક માહિતીના આધારે અમે ફરિયાદ નોંધીને વધુ તપાસ હાથ ધરી છે એમ જણાવતાં બાંદરા પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘ફરિયાદ ભલે હમણાં નોંધાઈ હોય, પણ અમે સતત ફરિયાદીના સંપર્કમાં હતા, તેમની પાસેથી માહિતી લઈ રહ્યા હતા. હાલમાં અમે જે અકાઉન્ટમાં પૈસા ટ્રાન્સફર થયા છે એની માહિતી મેળવી રહ્યા છીએ.’