શિંદેસેનાના મિનિસ્ટર સંજય શિરસાટ સામે રાજ્ય સરકારે ભ્રષ્ટાચારની તપાસનો આદેશ આપ્યો

CIDCOના ચૅરમૅન તરીકે જમીનની ફાળવણીમાં ૪૫૦૦ કરોડની ગેરરીતિ કરી હોવાનો આક્ષેપ NCP-SPના રોહિત પવારે કર્યો હતો

સંજય શિરસાટ

મહારાષ્ટ્રના મિનિસ્ટર અને શિવસેનાના નેતા સંજય શિરસાટ સામે ૪૫૦૦ કરોડ રૂપિયાના જમીનકૌભાંડના આરોપોની તપાસ કરવા માટે રાજ્ય સરકારે એક કમિટીની રચના કરી છે. આ નિર્ણયને પગલે મહાયુતિના સાથીદારો BJP અને શિવસેના વચ્ચે ઑલરેડી જે શીતયુદ્ધ ચાલી રહ્યું છે એમાં ભડકો થવાની શક્યતા છે. 

નૅશનલિસ્ટ કૉન્ગ્રેસ પાર્ટી-શરદ પવાર (NCP-SP)ના વિધાનસભ્ય રોહિત પવાર દ્વારા સતત કરવામાં આવેલા આરોપો પછી આ નિર્ણય લેવામાં આવ્યો છે. રોહિત પવારે દાવો કર્યો હતો કે સંજય શિરસાટ સિટી ઍન્ડ ઇન્ડસ્ટ્રિયલ ડેવલપમેન્ટ કૉર્પોરેશન (CIDCO)ના ચૅરમૅન હતા ત્યારે નવી મુંબઈમાં CIDCOની જમીનના અલૉટમેન્ટમાં મોટા પાયે ગેરરીતિઓ આચરવામાં આવી હતી. 
તપાસ માટે રચવામાં આવેલી કમિટીમાં CIDCOના જૉઇન્ટ મૅનેજિંગ ડિરેક્ટર, રાયગડ જિલ્લા કલેક્ટર, થાણે અને રાયગડના ચીફ લૅન્ડ ઑફિસર અને લૅન્ડ રેકૉર્ડ ઑફિસર્સ, અલીબાગના ડેપ્યુટી કન્ઝર્વેટર વગેરે અધિકારીઓનો સમાવેશ થાય છે. આ કમિટીને આ કેસ સાથે જોડાયેલા તમામ જમીનવ્યવહારોની તપાસ કરવાનું કામ સોંપવામાં આવ્યું છે.