નવી મુંબઈમાં રેઇનકોટ પહેરીને બાઇક પર આવતા ચેઇનસ્નૅચર્સનો આતંક

નવી મુંબઈમાં વૃદ્ધ મહિલાઓને નિશાન બનાવતી રેઇનકોટધારી બાઇકર્સ ગૅન્ગ સક્રિય થઈ છે.

પ્રતીકાત્મક તસવીર

નવી મુંબઈમાં વૃદ્ધ મહિલાઓને નિશાન બનાવતી રેઇનકોટધારી બાઇકર્સ ગૅન્ગ સક્રિય થઈ છે. પનવેલ નજીક ખાંદેશ્વર વિસ્તારમાં ટૂ-વ્હીલર પર આવેલા બે ચોરો સોમવારે સવારે મંદિરથી પાછાં ફરી રહેલાં ૬૫ વર્ષનાં વૃદ્ધ મહિલાના ગળામાંથી ૪.૦૮ લાખ રૂપિયાની કિંમતનું મંગળસૂત્ર અને સોનાની ચેઇન આંચકીને ફરાર થઈ ગયા હતા. સોમવારે બપોરે પવનેલમાં પણ આ જ રીતે ૭૨ વર્ષનાં મહિલાની ચેઇન ચોરવામાં આવી હતી. આ બન્ને કેસમાં પનવેલ અને ખાંદેશ્વર પોલીસ-સ્ટેશનમાં સેપરેટ ફરિયાદ નોંધવવામાં આવી છે. આ ઘટના સમયે બાઇક પર આવેલા બન્ને આરોપીઓએ વાદળી રંગના રેઇનકોટ પહેરેલા હતા.

નવી મુંબઈના પોલીસ-કમિશનર મિલિંદ ભારંબેના કાર્યકાળમાં ટેક્નૉલૉજીનો ઉપયોગ વધ્યો છે અને ડ્રગ્સવિરોધી મોટાં અભિયાનો પણ ચલાવવામાં આવ્યાં છે, પરંતુ રોડ પર થતી આવી ચીલઝડપની ઘટનાઓ રોકવામાં પોલીસતંત્ર નિષ્ફળ નીવડ્યું હોવાનો દાવો કરવામાં આવ્યો છે. સ્થાનિક નાગરિકોમાં પોલીસના પૅટ્રોલિંગ અને સુરક્ષાનાં પગલાં સામે ગંભીર સવાલો ઊભા થઈ રહ્યા છે.

૧૫ દિવસમાં ચોથી ઘટના

ઉલ્લેખનીય છે કે છેલ્લા ૧૫ દિવસના આંકડાઓ પર નજર કરીએ તો નવી મુંબઈમાં આ જ કાર્યપદ્ધતિથી લૂંટની ચોથી ઘટના સામે આવી છે. આ પહેલાં ૩ ઑગસ્ટે નવા રબાળેમાં ૭૯ વર્ષનાં મહિલાની સોનાની ચેઇન ઝૂંટવી લેવાઈ હતી. ત્યાર બાદ ૯ ઑગસ્ટે વાશીમાં ૬૨ વર્ષનાં મહિલાની દોઢ તોલાની ચેઇન લૂંટી લેવામાં આવી હતી. એમાં પણ સેપરેટ ફરિયાદ બન્ને અલગ-અલગ પોલીસ-સ્ટેશનમાં  નોંધાવવામાં આવી છે. આ તમામ બનાવોમાં રેઇનકોટ પહેરેલી ગૅન્ગે વૃદ્ધ મહિલાઓને જ નિશાન બનાવ્યાં છે.