માઝગાવમાં ચાલીના એક રૂમમાં લાગેલી આગને લીધે પાંચથી વધુ રૂમ બળીને ખાખ

એક પછી એક ગૅસનાં સિલિન્ડર ફાટવા માંડ્યાં એને પગલે જબરદસ્ત દહેશત

આગને કારણે ચાલના માળખાને ભારે નુકસાન થયું હતું. સલામતીના પગલે સિલિન્ડરો બહાર કાઢી લેવાયાં હતાં. તસવીરો: આશિષ રાજે

મંગળવારે બપોરે માઝગાવ વિસ્તારમાં એક ચાલમાં ભીષણ આગ લાગી હતી. લિ​ક્વિફાઇડ પેટ્રોલિયમ ગૅસ (LPG) સિલિન્ડર ફાટતાં આગ બેકાબૂ બની હતી. એક પછી એક સિલિન્ડર-બ્લાસ્ટ થતાં ધડાકાના અવાજથી આસપાસના લોકો ડરી ગયા હતા. ગ્રાઉન્ડ પ્લસ ૩ માળની ચાલમાં પાંચથી સાત રૂમ આગમાં હોમાતાં ચાલનું ખાલી માળખું જ બચ્યું હતું. ૭૩ વર્ષના એક વડીલ આ ઘટનામાં દાઝ્યા હતા.

બૃહન્મુંબઈ મ્યુનિસિપલ કૉર્પોરેશન (BMC)એ આપેલી માહિતી મુજબ રેતી બંદર રોડ પર ગુરુકૃપા ચાલમાં બપોરે ૩.૧૫ વાગ્યે આગ લાગી હતી જે પ્રાથમિક દૃષ્ટિએ શૉર્ટ-સર્કિટને કારણે એક રૂમમાં લાગી હતી, પરંતુ આગને કારણે LPG સિલિન્ડર બ્લાસ્ટ થયા બાદ બાજુનાં ચારથી પાંચ રૂમ આગની ઝપેટમાં આવ્યા હતા. કુલ ૪ સિલિન્ડર બ્લાસ્ટ થતાં આગ વધુ વિકરાળ બની હતી. ફાયર-બ્રિગેડ અને આસપાસના રહીશોએ ચાલીનાં બધાં જ ઘરોમાંથી સિલિન્ડર બહાર કાઢીને હોનારત થવાનું જોખમ ટાળ્યું હતું.

સાંજે ૪.૩૫ વાગ્યે આગને વધુ ફેલાતી રોકવામાં સફળતા મળી હતી, પણ આગ બુઝાવવાની કામગીરી મોડી રાત સુધી ચાલી હતી.