મુંબઈમાં CNG ફરી થયું મોંઘુ: ઓટો-ટેક્સી યુનિયનો કરી ભાડામાં વધારો કરવાની માગ

Mumbai CNG Price Hike: મુંબઈ અને આસપાસના વિસ્તારોમાં CNG અને PNGનો ઉપયોગ કરતા ગ્રાહકો ફરી એકવાર મોંઘવારીનો ભોગ બન્યા છે. મહાનગર ગેસ લિમિટેડ (MGL) એ CNG ના ભાવમાં પ્રતિ કિલો રૂ. 2 નો વધારો કર્યો છે.

પ્રતીકાત્મક તસવીર (સૌજન્ય: મિડ-ડે)

મુંબઈ અને આસપાસના વિસ્તારોમાં CNG અને PNGનો ઉપયોગ કરતા ગ્રાહકો ફરી એકવાર મોંઘવારીનો ભોગ બન્યા છે. મહાનગર ગેસ લિમિટેડ (MGL) એ CNG ના ભાવમાં પ્રતિ કિલો રૂ. 2 નો વધારો કર્યો છે, જ્યારે ઘરેલું પાઇપ્ડ નેચરલ ગેસ (PNG) માં પ્રતિ સ્ટાન્ડર્ડ ક્યુબિક મીટર (SCM) માટે 50 પૈસાનો વધારો કરવામાં આવ્યો છે. નવા ભાવ 29-30 મેની મધ્યરાત્રિથી અમલમાં આવ્યા છે.

નવા ભાવો અનુસાર, મુંબઈમાં CNG ના ભાવ રૂ. 84 પ્રતિ કિલોથી વધીને રૂ. 86 પ્રતિ કિલો થઈ ગયા છે. બીજી તરફ, ઘરેલું PNG ના ભાવ હવે રૂ. 52 પ્રતિ SCM થઈ ગયા છે. નોંધનીય છે કે છેલ્લા 15 દિવસમાં આ બીજી વખત ગેસના ભાવમાં વધારો કરવામાં આવ્યો છે. અગાઉ, 13-14 મેના રોજ, CNG ના ભાવમાં પણ રૂ. 2 નો વધારો કરવામાં આવ્યો હતો.

ગેસના ભાવ કેમ વધી રહ્યા છે?

MGL ના અધિકારીઓના મતે, દેશમાં ઉપલબ્ધ કુદરતી ગેસની ફાળવણીમાં ઘટાડો થયો છે. જેના કારણે કંપનીને વધુ મોંઘા વૈકલ્પિક અને આયાતી સ્ત્રોતોમાંથી ગેસ ખરીદવો પડી રહ્યો છે. ઉપરાંત, અમેરિકન ડોલર સામે ભારતીય રૂપિયાના નબળા પડવાથી આયાતી ગેસના ભાવમાં પણ વધારો થયો છે, જેની સીધી અસર ગ્રાહકો પર પડી છે.

ભાવ વધારા છતાં, MGL કહે છે કે CNG હજુ પણ સૌથી વધુ ખર્ચ-અસરકારક ઇંધણ છે. કંપનીના જણાવ્યા અનુસાર, મુંબઈમાં હાલના ભાવોને ધ્યાનમાં લેતા, CNGનો ઉપયોગ પેટ્રોલની સરખામણીમાં લગભગ 45 ટકા અને ડીઝલની સરખામણીમાં લગભગ 12 ટકા બચાવે છે.

ઓટો અને ટેક્સી ભાડામાં વધારો કરવાની માંગ

CNGના ભાવમાં વધારાથી ઓટો-રિક્ષા અને ટેક્સી ડ્રાઇવરોના સંચાલન ખર્ચમાં વધારો થયો છે. આને કારણે, વિવિધ ઓટો-ટેક્સી યુનિયનો ભાડામાં રૂ. 2 થી રૂ. 3 નો વધારો કરવાની માંગ કરી રહ્યા છે. જો સરકાર અથવા સંબંધિત અધિકારીઓ આ માંગણી સ્વીકારે છે, તો મુસાફરોને પણ વધારાનો ખર્ચ સહન કરવો પડી શકે છે.

મુંબઈ મેટ્રોપોલિટન રિજનમાં CNG વાહનોની સંખ્યા

મુંબઈ મેટ્રોપોલિટન રિજન (MMR) માં CNG આધારિત વાહનોની સંખ્યા 12 લાખથી વધુ છે. આમાં 5 લાખથી વધુ ખાનગી કાર, 4.7 લાખથી વધુ ઓટો-રિક્ષા, 1.6 લાખથી વધુ ટેક્સી, 50 હજારથી વધુ ખાનગી બસો અને ટેમ્પો અને 1,900 થી વધુ જાહેર બસોનો સમાવેશ થાય છે.

દિલ્હીમાં પણ CNGના ભાવ વધી રહ્યા છે

માત્ર મુંબઈ જ નહીં, પરંતુ દિલ્હીમાં પણ CNGના ભાવ સતત વધી રહ્યા છે. ઈરાન યુદ્ધ અને વૈશ્વિક ઉર્જા બજારમાં અનિશ્ચિતતા વચ્ચે, છેલ્લા બે અઠવાડિયામાં દિલ્હીમાં CNGના ભાવ ચાર વખત વધારવામાં આવ્યા છે. ઇન્દ્રપ્રસ્થ ગેસ લિમિટેડ (IGL) એ 26 મેના રોજ CNGના ભાવમાં પ્રતિ કિલો રૂ. 2 નો વધારો કરવાની જાહેરાત કરી હતી.