આગ્રીપાડામાં ચાલતી ડ્રગ્સની ફૅક્ટરી પકડાઈ

મુંબઈની ક્રાઇમ બ્રાન્ચે ૫૦.૭૪ કરોડ રૂપિયાનું ડ્રગ્સ અને હથિયારો જપ્ત કર્યાં

પ્રતીકાત્મક તસવીર

મુંબઈ પોલીસની ક્રાઇમ બ્રાન્ચના ઍન્ટિ-નાર્કોટિક્સ સેલ (ANC)એ આગ્રીપાડા વિસ્તારમાં એક મોટી કાર્યવાહી કરીને એક રહેણાક મકાનમાં ધમધમતી ગેરકાયદે ડ્રગ્સ ફૅક્ટરીનો પર્દાફાશ કર્યો છે. આ દરોડા દરમ્યાન પોલીસે અંદાજે ૫૦.૭૪ કરોડ રૂપિયાનું મેફેડ્રોન (MD) ડ્રગ્સ અને લિક્વિડ MDનો મોટો જથ્થો જપ્ત કર્યો હતો. આ સાથે જ પોલીસે ઘટનાસ્થળેથી એક દેશી પિસ્તોલ અને ૧૯ જીવંત કારતૂસ પણ હસ્તગત કર્યાં છે અને આ ગુનામાં સંડોવાયેલા ૩ આરોપીઓની ધરપકડ કરી છે.

કાંદિવલીના ANC યુનિટના એક સિનિયર અધિકારીએ ‘મિડ-ડે’ને કહ્યું હતું કે ‘ગેરકાયદે ડ્રગ્સ ફૅક્ટરી વિશે ચોક્કસ ગુપ્ત માહિતી મળતાં સોમવારે આગ્રીપાડા વિસ્તારમાં છટકું ગોઠવ્યું હતું અને દરોડો પાડ્યો હતો. આ કાર્યવાહી દરમ્યાન ઘટનાસ્થળેથી આશરે ૨૯.૦૮ કરોડ રૂપિયાનું ૮ કિલો લિક્વિડ MD અને ડ્રગ્સ બનાવવાનું સાહિત્ય મળી આવ્યું હતું. આ ઉપરાંત ૨૧.૬૫ કરોડ રૂપિયાનું ૬.૧૮૮ કિલો પાઉડર સ્વરૂપનું મેફેડ્રોન ડ્રગ્સ પણ જપ્ત કરવામાં આવ્યું હતું. ડ્રગ્સ બનાવવા માટે ઉપયોગમાં લેવાતાં વિવિધ કેમિકલ્સ, કાચો માલ, આધુનિક સાધનો તેમ જ અંદાજે ૬૪,૦૦૦ રૂપિયાની દેશી બનાવટની પિસ્તોલ અને કારતૂસ કબજે કરીને આખી ફૅક્ટરીને સંપૂર્ણપણે સીલ કરી દીધી છે.’

આ હાઈ-પ્રોફાઇલ કેસમાં કાંદિવલી યુનિટ દ્વારા નાર્કોટિક ડ્રગ્સ ઍન્ડ સાયકોટ્રૉપિક સબસ્ટન્સિસ (NDPS) ઍક્ટની વિવિધ કલમો તેમ જ આર્મ્સ ઍક્ટ હેઠળ ફરિયાદ નોંધીને ત્રણેય આરોપીઓની ધરપકડ કરવામાં આવી છે. પોલીસ હવે એ દિશામાં સઘન તપાસ ચલાવી રહી છે કે આ ગેરકાયદે ડ્રગ્સ ફૅક્ટરી કેટલા સમયથી ચાલી રહી હતી અને આ આંતરરાષ્ટ્રીય રૅકેટ પાછળ અન્ય કયાં મોટાં માથાં સામેલ છે. પકડાયેલા આરોપીઓની પૂછપરછમાં ડ્રગ્સ સપ્લાય ચેઇનને લઈને આગામી દિવસોમાં અન્ય ઘણા ચોંકાવનારા ખુલાસા થવાની શક્યતા સેવાઈ રહી છે.