16 September, 2026 05:21 PM IST | Mumbai | Gujarati Mid-day Online Correspondent
જાણો ક્યાં છે આ ગણેશ પંડાલ?
મુંબઈમાં ગણેશોત્સવમાં અનેરો ઉત્સાહ જોવા મળે છે. દર વર્ષની જેમ આ વર્ષે પણ ગણેશ પંડાલોમાં ભવ્ય અનોખા ડેકોરેશનની સ્પર્ધા જામી છે. તેમાં જ મુંબઈના સહ્યાદ્રી ક્રીડા મંડળના ગણપતિ પંડાલમાં માર્વેલ સિનેમેટિક યુનિવર્સના ઍવેન્જર્સ અને DC સહિત ભારતીય સુપરહીરોની થીમવાળું ડેકોરેશન કરવાં આવ્યું છે, જેની ખૂબ જ ચર્ચા થઈ રહી છે. સોશિયલ મીડિયા પર આ પંડાલના વીડિયો વાયરલ થઈ રહ્યો છે, જેમાં સજાવટના ભાગરૂપે `આવેન્જર્સ` અને માર્વેલ યુનિવર્સના લોકપ્રિય સુપરહીરોને દર્શાવવામાં આવ્યા છે. મંડળ આ વર્ષે તેની 50મી વર્ષગાંઠની ઉજવણી કરી રહ્યું છે.
ડેકોરેશનમાં રૉબર્ટ ડાઉની જુનિયરનો `આયર્ન મૅન`, ક્રિસ ઇવાન્સનો `કૅપ્ટન અમેરિકા`, માર્ક રફાલોનો `હલ્ક` અને સ્કારલૅટ જોહાનસનની `બ્લૅક વિડો` જેવા સુપરહીરોનો સમાવેશ થાય છે. આ ઉપરાંત, રાયન રૅનોલ્ડ્સનો `ડૅડપૂલ` અને અન્ય ઘણા લોકપ્રિય માર્વેલ સુપરહીરો પણ ગણપતિ પંડાલમાં મૂકવામાં આવ્યા છે. ગણેશોત્સવના ઉત્સવપૂર્ણ વાતાવરણ સાથે સુમેળ સાધવા માટે આ પાત્રોને સજાવટમાં સામેલ કરવામાં આવ્યા છે. વીડિયોમાં લોકોને આ સુપરહીરો સાથે તસવીરો પડાવતા જોઈ શકાય છે.
માર્વેલ-થીમ આધારિત આ ગણપતિ મંડળના ડેકોરેશનની થીમ એવા સમયે જોવા મળી છે જ્યારે ઍવેન્જર્સ: ઍન્ડગેમ: ઍનકોર (Avengers: Endgame: Encore) ફરીથી મોટા પડદા પર આવી રહી છે. આ ફિલ્મ 25 સપ્ટેમ્બરે થિયેટરોમાં ફરીથી રિલીઝ થવાની છે. ઍવેન્જર્સ: ઍન્ડગેમને `ઇન્ફિનિટી સાગા`ના સમાપન તરીકે જોવામાં આવે છે. ચાહકો હવે માર્વેલની આગામી મોટી ફિલ્મ ઍવેન્જર્સ: ડૂમ્સડે (Avengers: Doomsday) વિશે પણ ખૂબ ઉત્સાહિત છે, જે 18 ડિસેમ્બરે રિલીઝ થવાની છે.
માર્વેલ-થીમ આધારિત આ ડેકોરેશન સોશિયલ મીડિયા પર ખૂબ ચર્ચામાં છે. કન્ટેન્ટ ક્રિએટર રણવીર અલાહબાદિયા પણ ગણપતિ પંડાલની મુલાકાત માટે આવ્યો હતો, અહીં તેણે `બ્લૅક પૅન્થર` સાથે તસવીર ક્લિક કરાવી હતી. આમ, પોતાની 50મી વર્ષગાંઠ ઉજવી રહેલા આ પંડાલની સજાવટમાં પરંપરાગત ગણેશોત્સવની ઉજવણીની સાથે લોકપ્રિય માર્વેલ સુપરહીરોએ પણ સ્થાન મેળવ્યું છે. ઍવેન્જર્સ: ઍન્ડગેમ: એનકોરની પુનઃ-રિલીઝ વચ્ચે, આ પ્રદર્શન માર્વેલના ચાહકો માટે વિશેષ આકર્ષણનું કેન્દ્ર બન્યું છે. આ અનોખું ડેકોરેશન જોવા માટે તમને ચેમ્બુર અથવા તિલકનગર જવું પડશે
