પશ્ચિમ રેલવેમાં લોકલ સેવાઓ ખોરવાઈ, ટ્રેન મેનેજમેન્ટ સિસ્ટમમાં ખામી સર્જાતા ટ્રેનો મોડી

Mumbai Local Train Running Status: ટ્રેન મેનેજમેન્ટ સિસ્ટમમાં ટેકનિકલ ખામીને કારણે પશ્ચિમ રેલ્વેની ઉપનગરીય સેવાઓ ભારે ખોરવાઈ ગઈ હતી, જેના કારણે ટ્રેનો મોડી પડી હતી. ઘણી ટ્રેનો લાઇનમાં ઉભી રહી હતી, જેના કારણે બપોરના સમયપત્રક પર અસર પડી હતી.

પ્રતીકાત્મક ફાઇલ તસવીર

ટ્રેન મેનેજમેન્ટ સિસ્ટમ (TMS) માં ટેકનિકલ ખામી સર્જાતા પશ્ચિમ રેલવેની ઉપનગરીય સેવાઓ પર ભારે અસર પડી હતી, જેના કારણે મુંબઈ લોકલ ટ્રેનો અટકી ગઈ હતી. આ ખામીને કારણે ઘણી ટ્રેનોની અવરજવર ખોરવાઈ હતી, જેના કારણે બપોરની ટ્રેનોના સમયમાં ભારે વિલંબ થયો હતો અને સાંજે ભીડના સમયે દોડતી ટ્રેનોને પણ તેની અસર થઈ હોવાનું જોવા મળી રહ્યું છે.

ટ્રેન મેનેજમેન્ટ સિસ્ટમમાં ટેકનિકલ ખામીને કારણે પશ્ચિમ રેલ્વેની ઉપનગરીય સેવાઓ ભારે ખોરવાઈ ગઈ હતી, જેના કારણે ટ્રેનો મોડી પડી હતી. ઘણી ટ્રેનો લાઇનમાં ઉભી રહી હતી, જેના કારણે બપોરના સમયપત્રક પર અસર પડી હતી.

"એક ટ્રેન પ્લેટફોર્મ નંબર 5 પર લાંબા સમય સુધી રોકાઈ હતી કારણ કે વારંવાર જાહેરાત કરવામાં આવી રહી હતી કે તે ચર્ચગેટ ફાસ્ટ લોકલ છે. જ્યારે હું ત્યાં પહોંચ્યો ત્યારે મોટરમેન કંટ્રોલ રૂમમાં ફોન કરીને કહી રહ્યો હતો કે તે વિરાર ફાસ્ટ છે. પાંચથી દસ મિનિટ પછી, પ્લેટફોર્મ પર જાહેરાત કરવામાં આવી કે તે ખરેખર વિરાર ફાસ્ટ છે," એક મુસાફર વેદાંત મ્હાત્રેએ જણાવ્યું.

"ટીએમએસમાં એક સમસ્યા હતી, જે બપોરે 2.30 વાગ્યે 25 મિનિટ માટે થઈ હતી. આ ખામીને લીધે ટ્રેનોના સમય પત્રક પર ભારે અસર થઈ હતી અને ટ્રેનો 10-15 મિનિટ મોડી પડી હતી. સમસ્યાને સુધારી લેવામાં આવી છે," પશ્ચિમ રેલવેના પ્રવક્તાએ જણાવ્યું હતું. તેમણે ઉમેર્યું હતું કે, "આ કોઈ મોટી ખામી નહોતી જેથી તેને અડધા કલાકમાં સમસ્યાને સુધારી લેવામાં આવી હતી."

મુંબઈ લોકલને વધુ ઝડપી બનશે

રોજેરોજ મુંબઈ લોકલની ભીડમાં પ્રવાસ કરતા મુંબઈગરાઓ માટે સારા સમાચાર છે. રેલવેપ્રધાન અશ્વિની વૈષ્ણવે કહ્યું છે કે ‘મુંબઈની લોકલ ટ્રેનની ડિઝાઇનમાં હવે ફેરફાર કરવામાં આવશે. એમાં વધુ પ્રમાણમાં હવે હવાની હેરફેર થશે. વળી એ વધુ સ્પીડથી પણ દોડશે અને એના સસ્પેન્શનમાં પણ સુધારો કરવામાં આવ્યો હોવાથી વધુ આરામદાયક પ્રવાસ કરવો શક્ય બનશે.

રેલવે બજેટમાં મહારાષ્ટ્રને ૨૩,૭૭૮ કરોડ રૂપિયા ફાળવવામાં આવ્યા છે. વળી મુંબઈ લોકલની ૨૩૮ વધુ ઍર-કન્ડિશન્ડ ટ્રેન પાઇપલાઇનમાં છે. બીજું બે ટ્રેન વચ્ચેનો સમયગાળો અત્યારે ૧૮૦ સેકન્ડ છે જે ઘટાડીને ૧૫૦ સેકન્ડ કરવાનો ઇરાદો છે જેથી દિવસ દરમ્યાન વધુ ૩૦૦ સર્વિસ દોડાવી શકાશે.

એ સિવાય કોંકણ રેલવેને ઇન્ડિયન રેલવે સાથે મર્જ કરવાના પ્રયાસ ચાલી રહ્યા છે જેથી આગળ જઈ ચાર રાજ્યો મહારાષ્ટ્ર, ગોવા, કર્ણાટક અને કેરલાને જોડી શકાશે. જોકે અત્યાર સુધી ગોવાએ જ એ માટે સંમતિ દર્શાવી છે.