27 August, 2026 11:39 AM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
ભાંડુપ (Bhandup) નજીક સિગ્નલિંગ સિસ્ટમમાં સર્જાયેલી ટેકનિકલ ખામીના કારણે સેન્ટ્રલ રેલવે (Central Railway)નું ઉપનગરીય નેટવર્ક ખોરવાઈ જતાં ગુરુવારની સવારે હજારો મુસાફરોએ ભારે મુશ્કેલીનો સામનો કરવો પડ્યો હતો. આ ખામીને લીધે સવારના પીક અવર્સ દરમિયાન છત્રપતિ શિવાજી મહારાજ ટર્મિનસ (Chhatrapati Shivaji Maharaj Terminus) તરફ જતી લોકલ ટ્રેનો ધીમી પડી ગઈ હતી, જેના પરિણામે સમગ્ર વ્યસ્ત રૂટ પર ટ્રેન વ્યવહાર મોડો પડ્યો હતો.
સેન્ટ્રલ રેલવેની મુખ્ય લાઇન પર (Mumbai Local Train Updates) ગુરુવારે, ૨૭ ઓગસ્ટની સવારે પીક અવર્સ દરમિયાન ભાંડુપ રેલવે સ્ટેશન પર ટેકનિકલ ખામી સર્જાતાં ઉપનગરીય ટ્રેન વ્યવહારમાં ભારે વિક્ષેપ પડ્યો હતો. આ ટેકનિકલ ખામીના કારણે છત્રપતિ શિવાજી મહારાજ ટર્મિનસ (CSMT) તરફ જતી મુંબઈ લોકલ ટ્રેનોની અવરજવર ખોરવાઈ ગઈ હતી, જેના લીધે હજારો દૈનિક મુસાફરોને ભારે વિલંબનો સામનો કરવો પડ્યો હતો.
સેન્ટ્રલ રેલવેના અધિકારીઓના જણાવ્યા અનુસાર, ગુરુવારે વહેલી સવારે ૭:૪૭ વાગ્યે ભાંડુપ સ્ટેશન પર સિગ્નલ S23 માં પોઇન્ટ ફેલ્યોર થતાં ટેકનિકલ સમસ્યા સર્જાઈ હતી. આ સમસ્યાએ સીએસએમટી (CSMT) તરફ જતી અપ લાઈન લોકલ ટ્રેન કામગીરીને સીધી અસર કરી હતી, જેના કારણે મુસાફરોની સુરક્ષા સુનિશ્ચિત કરવા માટે ટ્રેનોને નિર્ધારિત પાયલોટ સિગ્નલ માર્કર પર મર્યાદિત ઝડપે ચલાવવાની ફરજ પડી હતી.
સિગ્નલિંગ સિસ્ટમમાં અચાનક આવેલી ખામીને કારણે નાહુર-ભાંડુપ વિસ્તાર વચ્ચે એકપછી એક લોકલ ટ્રેનો અટવાઈ ગઈ હતી, જેના લીધે ટ્રેક પર ટ્રેનોનું ભારણ વધી ગયું હતું.
સ્ટેશન સત્તાવાળાઓ તરફથી એલર્ટ મળતાં જ સેન્ટ્રલ રેલવેના ટેકનિકલ સ્ટાફ અને એન્જિનિયરિંગ ટીમો પોઇન્ટ ફેલ્યોરને સુધારવા માટે સ્થળ પર દોડી ગયા હતા. સિગ્નલ રિપેરિંગનું કામ ૪૮ મિનિટમાં પૂર્ણ કરવામાં આવ્યું હતું અને સવારે ૮:૩૫ વાગ્યા સુધીમાં સામાન્ય સિગ્નલિંગ સિસ્ટમ સંપૂર્ણપણે પૂર્વવત કરી દેવામાં આવી હતી.
ટેકનિકલ ખામી ઉકેલાઈ ગઈ હોવા છતાં, સવારના પીક અવર્સ દરમિયાન ઉપનગરીય ટ્રેનોનું સમયપત્રક ૧૫ થી ૨૦ મિનિટ મોડું ચાલી રહ્યું હતું.
આ વિક્ષેપને કારણે થાણે (Thane), ભાંડુપ, કાંજુરમાર્ગ (Kanjurmarg) અને ઘાટકોપર (Ghatkopar) સહિતના સેન્ટ્રલ રેલવેના મુખ્ય સ્ટેશનો પર મુસાફરોને ભારે હાલાકી ભોગવવી પડી હતી. મુસાફરીના મુખ્ય સમયે ટ્રેનો મોડી પડતાં પ્લેટફોર્મ પર ભારે ભીડ જોવા મળી હતી. અનપેક્ષિત વિલંબના કારણે દક્ષિણ અને સેન્ટ્રલ મુંબઈની ઓફિસોમાં પહોંચવામાં અનેક મુસાફરો મોડા પડ્યા હોવાના અહેવાલો સાંપડ્યા છે.
રેલવે અધિકારીઓએ પુષ્ટિ કરી હતી કે, અપ ફાસ્ટ અને સ્લો લાઈન પર ટ્રેનોનો ભરાવો દૂર થયા બાદ ટ્રેનની ફ્રીક્વન્સી ધીમે ધીમે સામાન્ય થઈ ગઈ હતી.
