કાંદિવલીમાંથી ભેળસેળયુક્ત અમૂલ, ગોકુલ દૂધનો જથ્થો જપ્ત; એકની ધરપકડ

Mumbai Milk Adulteration: કાંદિવલી ઈસ્ટમાં `અમૂલ` અને `ગોકુલ` જેવી જાણીતી બ્રાન્ડ્સના દૂધમાં દૂષિત પાણી ભેળવીને વેચવા બદલ ૪૮ વર્ષીય શખ્સની ધરપકડ; પોલીસે ૭૪ લીટર ભેળસેળયુક્ત દૂધ, બ્રાન્ડેડ બ્રાન્ડના ખાલી પાઉચ અને પાઉચ સીલ કરવાના સાધનો જપ્ત કર્યા

તસવીર સૌજન્યઃ મિડ-ડે

મુંબઈ (Mumbai) ની સમતા નગર પોલીસ (Samta Nagar Police) એ `અમૂલ` (Amul) અને `ગોકુલ` (Gokul) જેવી જાણીતી બ્રાન્ડ્સના દૂધમાં દૂષિત પાણી ભેળવીને ગ્રાહકોને વેચવા બદલ ૪૮ વર્ષીય શખ્સની ધરપકડ કરી છે. કાંદિવલી (Kandivali) ઈસ્ટમાં તેના રહેણાંક વિસ્તાર પર વહેલી સવારે પાડવામાં આવેલા દરોડા દરમિયાન, પોલીસે ૭૪ લીટર ભેળસેળયુક્ત દૂધ, પેકિંગ સામગ્રી અને બ્રાન્ડ નામવાળા ખાલી પાઉચ જપ્ત કર્યા છે.

કાંદિવલી ઈસ્ટમાં વહેલી સવારે દરોડો પાડી ભેળસેળનું કૌભાંડ પકડ્યું

રહેણાંક વિસ્તારમાં ગેરકાયદેસર રીતે દૂધમાં ભેળસેળ (Mumbai Milk Adulteration) થઈ રહી હોવાની ચોક્કસ બાતમી મળ્યા બાદ સમતા નગર પોલીસ સ્ટેશનના ક્રાઈમ ઈન્વેસ્ટિગેશન યુનિટ દ્વારા આ કામગીરી હાથ ધરવામાં આવી હતી. અટકાયત કરાયેલા આરોપીની ઓળખ કાંદિવલી ઈસ્ટના દામુનગર બસ સ્ટોપ નજીક લક્ષ્મીનગરમાં રામ ઉજાગર ચાલના રહેવાસી ઈરાન્ના લિંગ્યા ગોપનાબાઈ (Iranna Lingya Gopanabai) તરીકે થઈ છે.

બાતમીના આધારે કાર્યવાહી કરીને, પોલીસ ટીમે બુધવાર, ૧૨ ઓગસ્ટના રોજ સવારે લગભગ ૫:૫૦ વાગ્યે ગોપનાબાઈના ઘરે દરોડો પાડ્યો હતો. અધિકારીઓએ આરોપીને અમૂલ અને ગોકુલ દૂધના અડધા લીટર અને એક લીટરના પાઉચ કાપી, તેમાં અસ્વચ્છ પાણી ઉમેરીને અને રિટેલ વેચાણ માટે તેને ફરીથી સીલ કરતા રંગેહાથ ઝડપી પાડ્યો હતો.

૭૪ લીટર દૂષિત દૂધ અને સીલિંગના સાધનો જપ્ત

તપાસ દરમિયાન પોલીસે બ્રાન્ડેડ કન્ટેનર અને પ્લાસ્ટિકના પાઉચમાં ભરેલું ૭૪ લીટર ભેળસેળયુક્ત દૂધ કબજે કર્યું હતું. આ સિવાય, તપાસકર્તાઓએ પાઉચ સીલ કરવા માટે વપરાતી મીણબત્તીઓ, સીલિંગ ટૂલ્સ, માપવાના કપ અને અમૂલ તથા ગોકુલના અધિકૃત લોગો ધરાવતા ખાલી પ્લાસ્ટિકના પાઉચનો મોટો જથ્થો જપ્ત કર્યો હતો.

જપ્ત કરાયેલા દૂધના સેમ્પલને ભેળસેળનું ચોક્કસ પ્રમાણ અને સ્વાસ્થ્ય પર થતા જોખમોની તપાસ માટે લેબોરેટરીમાં મોકલવામાં આવ્યા છે. પોલીસે નોંધ્યું હતું કે આરોપી પશ્ચિમી ઉપનગરોમાં રહેણાંક વિસ્તારોને ટાર્ગેટ કરતો હતો અને વહેલી સવારે હોમ ડિલિવરી દરમિયાન શંકા ન જાય તે રીતે ગ્રાહકોને આ દૂધ વેચતો હતો.

ભારતીય ન્યાય સંહિતા અને ફૂડ સેફ્ટી એક્ટ હેઠળ ગુનો નોંધાયો

ધરપકડ બાદ, સમતા નગર પોલીસે ગોપનાબાઈ વિરુદ્ધ કડક કાનૂની જોગવાઈઓ હેઠળ FIR નોંધી છે. આરોપી સામે ભારતીય ન્યાય સંહિતા (BNS) ની કલમ ૨૭૪ (વેચાણ માટેના ખોરાક કે પીણામાં ભેળસેળ), ૩૪૫(૩), ૩૪૭(૧), ૩૧૮(૪) (છેતરપિંડી), ૩૩૬(૩) (જીવન અથવા વ્યક્તિગત સુરક્ષાને જોખમમાં મૂકતું કૃત્ય) અને ૩(૫) હેઠળ ગુનો નોંધવામાં આવ્યો છે.

આ ઉપરાંત, પોલીસે ફૂડ સેફ્ટી એન્ડ સ્ટાન્ડર્ડ્સ એક્ટ, ૨૦૦૬ ની કલમ ૨૬, ૨૭ અને ૩૧ તેમજ તેને સંબંધિત ૨૦૧૧ ના નિયમો હેઠળ પણ કેસ દાખલ કર્યો છે. આ દરોડો એડિશનલ પોલીસ કમિશનર (નોર્થ રિજનલ ડિવિઝન) શશીકુમાર મીના, ડેપ્યુટી પોલીસ કમિશનર ગજાનન શિવલિંગ રાજમાણે અને સીનિયર પોલીસ ઈન્સ્પેક્ટર જયવંત શિંદેના માર્ગદર્શન હેઠળ પાડવામાં આવ્યો હતો. આ કૌભાંડમાં મદદ કરનારા અન્ય સાથીદારો કે સપ્લાયર્સને શોધવા માટે આગળની તપાસ ચાલી રહી છે.